Рабочыя Lufthansa Technik запатрабавалі не абслугоўваць самалёт Лукашэнкі. Яны нагадалі пра аналагічную адмову Чаўшэску
Рабочыя Lufthansa Technik запатрабавалі ад кіраўніцтва прадпрыемства адмовіцца ад абслугоўвання самалёта Лукашэнкі. Яны нагадалі пра аналагічную адмову Чаўшэску 31 год назад.
13 кастрычніка ў аэрапорце Фульсбютэль прызямліўся Боінг 737 з рэгістрацыйным нумарам EW-001PA.
Прафсаюз прадпрыемства ў адказ распаўсюдзіў наступную заяву:
«Гэта самалёт таго самага Лукашэнкі, які аддаў загад страляць у дэманстрантаў у Беларусі. Мы, прафсаюзныя актывісты кампаніі Lufthansa Technik, не забываем нашу даўнюю традыцыю міжнароднай салідарнасці і стаім поплеч з беларускімі працоўнымі», — гаворыцца ва ўлётцы прафсаюза кампаніі LufthansaTechnik.
У ёй утрымліваецца шэраг патрабаванняў да беларускага ўрада: «Мы патрабуем адстаўкі Лукашэнкі і сапраўдных дэмакратычных выбараў! Мы патрабуем вызвалення ўсіх палітычных зняволеных і неадкладнага аднаўлення на працы тых калег, якія страцілі працу! Мы патрабуем, каб усе супрацоўнікі маглі свабодна аб'ядноўвацца ў незалежныя прафсаюзы!»
Прафсаюз нагадвае, што 31 год таму ў кампаніі была падобная сітуацыя. Тады рабочыя кампаніі адмовіліся абслугоўваць самалёт кіраўніка Румыніі Чаўшэску незадоўга да яго падзення.
