У Полацку муж пасварыўся з жонкай і вырашыў спаліць яе цырульню, але жанчына дала годны адпор
У Полацку муж і жонка вырашылі развесціся, прычым ініцыятарам працэсу быў 39-гадовы мужчына. Яму спатрэбіліся неабходныя дакументы, якія ён стаў патрабаваць у жонкі. Для гэтага палачанін прыйшоў у цырульню, дзе працавала жанчына, і зладзіў скандал, паведамляе абласная міліцыя.
Потым пайшоў дадому, па дарозе выпіў і вырашыў вярнуцца да размовы з жонкай яшчэ раз. А для саліднасці аргументаў захапіў з сабой каністру з бензінам.
Зайшоўшы ў памяшканне, выгнаў з яго наведвальніц, затым стаў ламаць мэблю і стэлажы, а таксама абліваць усё бензінам. На шум выбегла дырэктарка цырульні і ўжо ўдзвюх з жонкай хулігана сталі выштурхоўваць яго прэч. Пры гэтым моцна трымалі палачаніна за рукі і не даючы магчымасць дастаць з кішэні запальнічку.
Праз некаторы час мужчына вырашыў сысці, а жанчыны звярнуліся ў міліцыю. Затрымалі мужчыну праз некалькі гадзін супрацоўнікі Дэпартамента аховы. Аказалася, што ўвесь гэты час ён блукаў па горадзе. У яго выявілі 1 праміле алкаголю. Заведзена крымінальная справа.
