21-гадовая дзяўчына атрымала на картку ў 10 разоў болей грошай. І тут пачалося!
21-гадовая жыхарка Наваполацка, папаўняючы сваю аплатную картку ў аддзяленні «Белпошты», паклала на яе 320 рублёў. Але падчас правядзення плацяжу паштарка выпадкова націснула на клавіятуры камп'ютара лішні нуль, і ў выніку на рахунак дзяўчыны ўпала сума ў 3200 рублёў, паведамляе абласная міліцыя.
Увечары навапалачанка выявіла, што стала ўладальніцай вялікай сумы. І яна стала дзейнічаць: хутка перавяла грошы на сваю зарплатную картку, а таксама картку свайго маладога чалавека.
Супрацоўнікі пошты, выявіўшы нястачу, спачатку паспрабавалі вярнуць грошы праз банк, а пасля няўдачы там звярнуліся па дапамогу ў міліцыю. Праваахоўнікі высветлілі, хто стаў уладальнікам сродкаў.
Спачатку дзяўчына казала, што папоўніла свой рахунак 3200 рублямі. Пасля пад цяжарам доказаў прызналася, што грошы дасталіся ёй з-за чужой памылкі. У дачыненні да яе заведзена крымінальная справа па частцы 1 артыкула 209 КК (махлярства).
УУС Віцебскага аблвыканкама папярэджвае: калі вам памылкова былі залічаны сродкі, якія вам не належаць, то паведаміце пра гэта ў банк. А калі вы патраціце чужыя грошы, то ў дачыненні да вас можа быць распачата крымінальная справа.
