«Самая магутная наша зброя»: першыя ФОТА з дывізіёна, які ўзброіўся ракетнымі комплексамі «Паланэз»
Падчас урачыстай цырымоніі рэактыўныя сістэмы залпавага агню «Паланэз» былі перададзеныя 77-му асобнаму рэактыўнаму артылерыйскаму дывізіёну міністрам абароны Беларусі Андрэем Раўковым, піша vsr.mil.by.
У дывізіён, які ўваходзіць у склад 336-й рэактыўнай артылерыйскай брыгады, былі прызначаны лепшыя афіцэры і жаўнеры-ракетчыкі.
«Добра б было, каб «Паланэз» не выкарыстоўваўся ў баявых умовах… Але калі спатрэбіцца, мы павінны быць гатовымі выкарыстаць яго ў складаны час для абароны суверэнітэту, тэрытарыяльнай цэласнасці, канстытуцыйнага строю і незалежнасці Рэспублікі Беларусь», — сказаў кіраўнік ваеннага ведамства.
Старшы лейтэнант Максім Яцко — камандзір баявога разліку, які першым правёў баявыя стрэльбы з новай РСЗА.
Перад цырымоніяй дывізіён правёў 150-кіламетровы марш са Слуцка, дзе адбываліся апошнія працы на прадпрыемстве-вытворцы.
Пакуль невядома, колькі дакладна «Паланэзаў» атрымала беларуская армія. На фота бачна як мінімум 2 комплексы і адна транспартна-зараджальная машына.
У чэрвені «Паланэзы» стралялі на тэрыторыі Беларусі і паказалі сваю моц і надзейнасць.
«Больш магутнай зброі ў нас няма… Выпрабавальныя пускі былі праведзеныя над дзевяццю раёнамі і трыма абласцямі. Адказнасць вайскоўцаў была найвышэйшай», — распавёў першы намеснік міністра абароны генерал-маёр Алег Белаконеў.
РСЗА «Паланэз» прызначаная для паражэння адкрыта размешчанай і ўкрытай жывой сілы, небраніраванай і браніраванай ваеннай і ваенна-спецыяльнай тэхнікі, артылерыі, ракетных і зенітных ракетных комплексаў, авіяцыйнай тэхнікі на аэрадромах базіравання і іншых аб'ектаў на далёкасці ад 50 км да 200 км з высокай дакладнасцю.
Рэактыўная сістэма залпавага агню ўпершыню была прэзентаваная 9 мая 2015 года на ваенным парадзе ў Мінску. Было заяўлена, што гэтая баявая машына можа адначасова нанесці кропкавы ўдар па васьмі цэлях на далёкасці больш за 200 кіламетраў.
РСЗА ўстаноўленая на чатырохвосным шасі высокай праходнасці МЗКЦ-7930. Імаверна, выкарыстоўваюцца высокадакладныя 301 мм кітайскія ракеты А200 масай 750 кг.
Акрамя васьмізараднай пускавой устаноўкі і транспартна-зараджальнай машыны на шасі МЗКЦ-7930, у склад падраздзялення уваходзіць мабільны камандны пункт батарэі на шасі аўтамабіля МАЗ-6317.
