Палова беларусаў мае генетычную мутацыю, што робіць курэнне асабліва небяспечным
Згодна з даследаваннямі беларускага Інстытуту генетыкі і цыталогіі, 48% беларусаў маюць генетычную мутацыю, што пагражае курцам анкалагічнымі і іншымі захворваннямі, піша СБ.
Фота: huffpost.com
У значнай часткі беларусаў ёсць генетычная мутацыя, пры якой перастае працаваць ген глутатыянтрансфераза, які ператварае шкодныя рэчывы, што ўтвараюцца пры курэнні, у зручныя для вывядзення формы. Такім чынам, небяспечныя рэчывы назапашваюцца ў арганізме і могуць стаць стымулятарамі разнастайных хвароб, у тым ліку анкалагічных.
Навука яшчэ не знайшла спосаб выправіць гэткую генетычную мутацыю.
Даследаванні беларускіх навукоўцаў паказалі, што такую мутацыю маюць 48% беларусаў, а сярод пацыентаў Мінскага анкалагічнага дыспансеру з дыягназам «рак лёгкага» такая мутацыя знайшлася практычна ў кожнага.
З узростам у арганізме назапашваюцца розныя шкодныя рэчы. Да анкалогіі прыводзяць 6-10 парушэнняў у геноме. Штуршок да хваробы могуць даць розныя фактары. Курэнне – адзін з галоўных, але не адзіны фактар.
Гэтая генетычная мутацыя робіць небяспечнымі не толькі тытунёвы дым, але і іншыя агрэсіўныя знешнія ўздзеянні.
У Беларусі рак лёгкага на першым месцы ў структуры анкалагічных захворванняў і па смертнасці ад іх. Хвароба паступова «маладзее», сустракаюцца ўжо хворыя і ў 30-гадовым узросце.
Беларусь – не адзіная краіна, жыхарам якой «пашчасціла» мець такую мутацыю. У розных краінах Еўропы з ёй жывуць 42-50% людзей.
