Прапагандысты посцяць фота пра «раскошнае жыццё» прэм'еркі Эстоніі пры СССР. Аказалася, што ўсё не так
Кая Калас расказала гісторыю фатаграфіі.
Прэм'ер-міністр Эстоніі Кая Калас (злева) з бацькамі. Фота: Karmen Joller / X
Расійскія і беларускія прапагандысты распаўсюджваюць фота прэм'ер-міністра Эстоніі Каі Калас у юнацтве. На здымку яна знятая з бацькамі ў інтэр'еры, які прапагандыстам здаўся багатым.
Тэлеграм-каналы публікуюць здымак прыкладна з адным і тым жа загалоўкам: «Фота сям'і Каі Калас, якая «пакутуе ад савецкай дыктатуры».
Тэксты пастоў таксама практычна ідэнтычныя. У іх расказваецца, што бацька будучай кіраўніцы еўрапейскай дыпламатыі Сійм Калас працаваў ва ўрадзе Эстонскай ССР, узначальваў рэспубліканскае аддзяленне Ашчадбанка, працаваў у газеце кампартыі. Прапагандысты цытуюць выказванне Калас пра жыццё ў савецкія часы: палітык расказвала, што ў дзяцінстве замест цукерак, якіх не было ў крамах ва ўмовах дэфіцыту, ела смятану з цукрам.
Фота падхапіў аўтар «Беларусь сегодня» Андрэй Мукавозчык — ён напісаў калонку пра «дабрыню СССР» які дазволіў Сійму Каласу пабудаваць кар'еру, нягледзячы на тое, што ягоны дзед у 1920-я гады працаваў у паліцыі і «ганяў камуністаў». Адрэагаваў на публікацыю і Рыгор Азаронак, які канстатаваў, што «СССР загубіла ягоная дабрыня».
Але, як аказалася, прарасійскія прапагандысты распаўсюдзілі фэйк. Фатаграфія была зробленая не ў савецкія часы, а ў сярэдзіне 1990-х — калі Эстонія ўжо аднавіла незалежнасць.
«Я спыталася ў Каі Калас пра гэтую фатаграфію. Здымак быў зроблены, калі Кая была ў 11-м ці 12-м класе, гэта значыць у 1994 ці 1995 годзе. Кая нарадзілася ў 1977 годзе, Эстонія здабыла незалежнасць у 1991 годзе. Мэбля на гэтых фотаздымках — сямейная спадчына. Такая мэбля ніколі не прадавалася ў СССР», — расказала ў X эстонская дэпутатка Кармэн Ёлер.
Адрэагавала на публікацыю і сама Калас.
«Сапраўды, здымак зроблены праз шмат часу пасля вызвалення ад акупацыі. Мэбля 1930-х гадоў, яе захавала іншая мая бабуля (не тая, якую саслалі ў Сібір), і яна паказвае, што да акупацыі Эстонія была квітнеючай краінай», — напісала прэм'ерка.
У сеціве таксама можна знайсці подпіс да гэтай фатаграфіі, які паведамляе, што яе зрабілі ў 1990-я гады.
У 1949 годзе маці Каі Калас Крысці разам з яе маці і бабуляй савецкая ўлада дэпартавала ў Сібір як членаў сям'і ўдзельніка эстонскай баявой арганізацыі «Амакайтсэ». Тады Крысці было ўсяго шэсць месяцаў, а на радзіму яна вярнулася толькі калі ёй споўнілася дзесяць гадоў.
Сама Кая Калас хутка будзе прызначаная кіраўніцай еўрапейскай дыпламатыі. Эстонскім урадам яна кіруе з 2021 года.
Чытайце таксама:
Колькі ўласных дыпламатаў знішчылі ў СССР, палюючы на ведзьмаў
Польшча і краіны Балтыі просяць пра абарончую лінію на мяжы з Расіяй і Беларуссю
