Пуцін спрабуе перадаць хусітам балістычныя і крылатыя ракеты — амерыканская выведка
«Гэта стане для нас паваротным момантам, калі Расія не спыніцца».
Уладзімір Пуцін і Аляксандр Лукашэнка на фоне абстралянага еменскімі хусітамі гандлёвага судна ў Чырвоным моры. Фоты: AP / Contributor Getty Images. Калаж: «Наша Ніва»
Брытанскае выданне Middle East Eye са спасылкай на крыніцы ў Пентагоне і выведцы ЗША паведамляе, што Пуцін папрасіў кіраўніцтва Саудаўскай Аравіі дазволіць яму транзіт на пастаўку расійскіх супрацькарабельных крылатых і балістычных ракет у рукі еменскіх хусітаў, якія працягваюць атакаваць адну з самых істотных у свеце гандлёвых артэрый у Чырвоным моры.
Калі гэта адбудзецца, гэта стане паваротным момантам для ЗША, заявілі апытаныя амерыканскія чыноўнікі.
На іх думку, намаганні Крамля звязаны з яго жаданнем зраўняць стаўкі з Захадам на фоне верагоднага пачатку поўнамаштабнай вайны паміж Ізраілем і «Хезбалой», якая можа аслабіць пазіцыі Ірана і Расіі ў рэгіёне. Да таго ж, Крэмль можа спадзявацца, што пастаўкі хусітам расійскіх ракет адцягнуць увагу Захада ад Украіны, упэўнены чыноўнікі.
Але кіраўніцтва Саудаўскай Аравіі, якое даўно варагуе з хусітамі і нават вяло супраць іх вайну, адмовіла Пуціну ў яго просьбе.
«Абмеркаванні гэтага пытання пачаліся пасля візіту Пуціна ў Саудаўскую Аравію ў снежні мінулага года. Падчас сустрэчы Уладзімір Пуцін і наследны прынц Саудаўскай Аравіі Махамед Бэн Салман дамовіліся «ліквідаваць напружанасць» у рэгіёне. Але нядаўняя просьба Пуціна аб транзіце ракет выклікала незадаволенасць Салмана, і той адмовіў Пуціну», — піша Middle East Eye са спасылкай на крыніцы.
Нагадаем, што хусіты — гэта ваенізаваная і радыкальная ісламісцкая групоўка, якая кантралюе траціну тэрыторыі Емена (міжнароднай супольнасцю іх улада там не прызнаная) і абстрэльвае любыя караблі, якія заходзяць у Чырвонае мора, што сур'ёзна парушае глабальнае суднаходства.
Хусіты дзейнічаюць у цесным саюзе з Іранам, які з'яўляецца іх асноўным фундатарам і заступнікам. Рукамі хусітаў Іран спрабуе дапамагчы баевікам ХАМАС у сектары Газы і націснуць на краіны Захада.
Як толькі ізраільская армія ўвайшла ў Газу ў адказ на масавае тэрарыстычнае ўварванне ХАМАС, хусіты адразу пачалі атакаваць гандлёвыя судны ў Чырвоным моры, якія, па іх сцвярджэннях, звязаныя з Ізраілем, аднак неўзабаве пераключыліся і на ўсе астатнія.
Чытайце таксама:
Хусіты «дапамаглі» Беларусі і Расіі з транзітам грузаў у Еўропу
Ці могуць хусіты цалкам адсекчы сусветны інтэрнэт? Разбіраемся
Расійскія эліты вераць у поспех паўторнага ўварвання ва Украіну праз Беларусь — Зыгар
