Студэнты БІП змогуць перавесціся ў вядучыя ВНУ Мінска, Магілёва і Гродна
30 жніўня адзін з найстарэйшых ВНУ краіны спыніць працу.
Фота: Belarusiinfo.by
Студэнты прыватнага ўніверсітэта БІП змогуць перавесціся ў вядучыя ВНУ Мінска, Магілёва і Гродна. Інфармацыя пра перавод студэнтаў прыватнай ВНУ, якая закрываецца 30 жніўня, будзе пададзена цягам двух тыдняў, расказалі ў Мінадукацыі.
Для працягу навучання студэнты і магістранты пасля заканчэння сесіі будуць цэнтралізавана пераведзеныя з іх згоды ў іншыя ўстановы адукацыі Беларусі, паведамляе БелТА.
«У цяперашні час пры падтрымцы Міністэрства адукацыі ідзе ўзгадненне пераводу студэнтаў, якія навучаюцца ў Мінску, у Беларускі дзяржаўны ўніверсітэт, Беларускі дзяржаўны эканамічны ўніверсітэт, Беларускі дзяржаўны педагагічны ўніверсітэт імя Максіма Танка, Беларускі дзяржаўны ўніверсітэт інфарматыкі і радыёэлектронікі, міжнародны ўніверсітэт «МІТСО», Інстытут бізнэсу БДУ», — растлумачылі ў Мінадукацыі.
Студэнты Магілёўскага філіяла БІП змогуць перавесціся ў Магілёўскі дзяржаўны ўніверсітэт імя Аркадзя Куляшова. Студэнты Гродзенскага філіяла — у Гродзенскі дзяржаўны ўніверсітэт імя Янкі Купалы.
«Заснавальнік і кіраўніцтва ўніверсітэта паведамілі, што інфармацыя пра магчымасці пераводу ў канкрэтныя ўніверсітэты цягам двух тыдняў будзе даведзена да кожнага навучэнца. Студэнты, якія не выказалі жадання перавесціся ў прапанаваную ўстанову адукацыі, маюць права самастойна выбраць установу вышэйшай адукацыі для працягу навучання па абранай спецыяльнасці», — заявілі ў ведамстве.
Чытайце таксама:
Закрываецца адна з найстарэйшых прыватных ВНУ
У Мінску не засталося ніводнага прыватнага дзіцячага садка
БДУІР набярэ больш мэтавікоў. Айцішнікаў забяруць сілавікі, ваенпрам, «Камунарка»
