Ракеты, якія расіяне ўначы запускалі па Украіне, праляталі цераз Беларусь
Пра інцыдэнт з перасячэннем ракет украінска-беларускай мяжы паведамілі два ўкраінскія маніторынгавыя каналы, звязаныя са службамі супрацьпаветранай абароны Украіны, заўважыў «Флагшток».
Схема руху расійскіх ракет і ўдарных БПЛА па тэрыторыі Украіны ноччу 22 чэрвеня 2024 года. Крыніца: тэлеграм-канал War monitor
Сёння ўначы ў 4:12 тэлеграм-канал War monitor паведаміў:
«Трэцяя група КР [крылатых ракет] перасекла мяжу Беларусі і не назіраецца». Праз 8 хвілін услед пайшло ўдакладненне: «Трэцяя група ракет або ракета знікла на мяжы з Беларуссю. Мы не можам сцвярджаць, што яна перасякала яе і зайшла ў паветраную прастору РБ».
Паведамленні аб выкарыстанні паветранай прасторы Беларусі з'явіліся ў тэлеграм-канале «Український Єнот» 22 чэрвеня ў 4:11:
«Новая група [ракет] ішла па мяжы з Беларуссю, перасякаючы яе».
Пасля завяршэння атакі гэты ж канал рэзюмаваў, што Лукашэнка па-ранейшаму дапускае манеўры расейскіх ракет уздоўж дзяржаўнай мяжы Беларусі і Украіны.
Ракета Х-101 на фоне стратэгічных бамбавікоў ВКС РФ
У каментары «Флагштоку» маніторынгавы канал «Український Єнот» удакладніў, што тэрыторыю Беларусі ноччу 22 чэрвеня ракеты X-101 перасякалі як мінімум два разы:
«Першая ракета зафіксаваная ў 3:40 [пазначаная чырвоным колерам]. Другая група ішла пазней [пазначаная сінім]. Дзесьці ў раёне Чарнобыльскай зоны яна знікла, далей з'явілася ў Ровенскай / Валынскай вобласці і на Луцк зайшла».
Схема руху ракет х-101 на тэрыторыі Беларусі ноччу 22.06.2024 паводле даных каментара тэлеграм-канала «Український Єнот» для «Флагштока»
У адпаведнасці з данымі маніторынгавай групы «Український Єнот», ракеты прайшлі над Брагінскім раёнам Гомельскай вобласці ў раёне пасёлка Камарын (ён, дарэчы, лічыцца крайнім паўднёвым пунктам Беларусі).
Паветраныя сілы УСУ паведамілі, што ўсяго за ноч 22 чэрвеня 2024 расійская армія выпусціла па ўкраінскай тэрыторыі 16 ракет розных тыпаў і 13 дронаў. Украінскія вайскоўцы збілі 12 ракет і ўсе беспілотнікі.
Падобны выпадак адбыўся ў ноч з 26 на 27 красавіка 2024 года. Тады некалькі расійскіх ракет прайшлі праз паветраную прастору Беларусі, таксама над тэрыторыяй Брагінскага раёна.
Чытайце таксама:
У Мінабароны Расіі пацвердзілі «групавы ўдар» па аб'ектах энергетыкі Украіны ў ноч на суботу
