Латушка расказаў, як Лукашэнка вырашае жыллёвыя праблемы набліжаных да яго асоб, і ці скарыстаўся ён з гэтых магчымасцяў сам
«Кіберпартызаны» ў сваім апошнім расследаванні расказалі пра спробу рэктара Беларускага дзяржаўнага ўніверсітэта Андрэя Караля атрымаць ільготную трохпакаёвую кватэру ў Мінску. Выданне «Люстэрка» раней у сувязі з гэтым даведалася, якая нерухомасць ужо ёсць у рэктара, ягонай жонкі і бацькоў, а цяпер распытала былога міністра культуры Паўла Латушкі, як гэтае пытанне ў сістэме, пабудаванай Лукашэнкам, вырашаецца ў прынцыпе.
Катэджны пасёлак у Драздах. Від зверху
«Такія рашэнні прымае асабіста Лукашэнка. Яму неабходна пісаць хадайніцтва, або за чалавека гэта можа зрабіць якая-небудзь вышэйшая службовая асоба. Мне вядомая практыка, калі кіраўнік парламента перад Лукашэнкам хадайнічаў у інтарэсах «прывілеяваных асоб» для атрымання зямельных участкаў», — сказаў Латушка.
Сярод дакументаў рэктара БДУ Андрэя Караля, якія пасля ўзлому сайта БДУ ўдалося знайсці «Кіберпартызанам», праект такога хадайніцтва сапраўды быў, і ён быў напісаны ад імя міністра адукацыі Ігара Карпенкі. Ці было хадайніцтва накіраванае наверх, невядома.
Але і без звароту да Лукашэнкі, па словах Паўла Латушкі, у такіх дзяржслужачых знаходзіліся спосабы вырашыць кватэрнае пытанне.
«Высокапастаўленыя чыноўнікі, наколькі я памятаю, у 2000-я гады мелі магчымасць атрымання льготнага крэдытавання для будаўніцтва жылля, фактычна не аплачваючы працэнты, а пасля дэнамінацыі дамы ў выніку абышліся значна танней», — успамінае былы міністр.
Пры гэтым кожны чыноўнік ад міністра і вышэй можа атрымаць у перыяд сваёй працы дом у катэджным пасёлку Дразды. Па словах Паўла Латушкі, частая практыка — калі ўчасткі там выдзяляюць напрамую, па асабістым рашэнні Лукашэнкі.
Міністры і іх намеснікі могуць на час працы атрымаць як дом у Драздах, так і летнюю дачу ў пасёлку Крылова пад Мінскам. Па словах Паўла Латушкі, сам ён, будучы дзяржслужачым, адмовіўся ад прапанаванага жылля і абраў жыццё ў сваім доме ў іншым месцы.
«Мне было прапанавана атрымаць дом у Драздах двойчы. Я адмовіўся. І таксама адмовіўся ад дачы ў Крылове, — кажа ён. — Працаваць і жыць побач з тымі ж людзьмі, якіх бачыш на працы, не самае вялікае задавальненне. Трэба яшчэ разумець, што гэта жыццё за плотам. Усе аб'екты маюць агароджы і ахову па перыметры. Я будаваў свой дом і таму хацеў жыць там».
Пры гэтым, па словах Паўла Латушкі, чыноўнікі і іншыя набліжаныя да Лукашэнкі могуць атрымаць жыллё ў «падарунак». Як правіла, гэтыя выпадкі не агавораныя заканадаўствам.
«Лукашэнка таксама практыкуе раздачу кватэр у Мінску, — расказвае экс-міністр. — Мне вядомыя выпадкі, калі ён бясплатна раздаваў жыллё пераможцам конкурсу «Міс Беларусь», таксама іншым набліжаным асобам. Нерухомасць магла фінансавацца ў тым ліку і са сродкаў бізнэсменаў, набліжаных да Лукашэнкі, а таксама за кошт забудоўшчыкаў, якіх абавязвалі некалькі кватэр перадаваць у сакрэтнае распараджэнне асабіста яму».
Чытайце таксама:
Стала вядома, што з жыллём у сям'і рэктара БДУ, які прасіў трохпакаёўку за ўдзел у рэпрэсіях
«Кіберпартызаны» ўзламалі рэктара БДУ Караля і даведаліся ўсё — каханкі, перапіскі, інтрыгі
«Кіберпартызаны» ўзламалі ўнутраную сетку БДУ і паназіралі, як там круцяцца жорны рэпрэсій
у якім?) няўжо не на літару Д"?