У Беларусі абяцаюць зноў павысіць заробкі і пенсіі
Пра магчымае павышэнне пенсій згадала ў сваім першым інтэрв'ю нядаўна прызначаная міністаркай працы і сацыяльнай абароны Беларусі Наталля Паўлючэнка. Адбудзецца гэта ў 2024 годзе, але калі дакладна — яснасці пакуль няма.
У эфіры тэлеканала «Беларусь 1» кіраўніца Мінпрацы нагадала, што з 1 студзеня 2024 года ў краіне павялічылі базавую стаўку. Яна вырасла на 6,4% (з 235 да 250 рублёў), што паўплывала на заробкі бюджэтнікаў.
Акрамя таго, па словах Наталлі Паўлючэнка, выраслі і дадатковыя стымулюючыя выплаты для ўсіх катэгорый. На гэтыя мэты з дзяржаўнага бюджэту выдзелена 1,64 мільярда рублёў.
Міністарка таксама заявіла, што заробкі ў Беларусі павінны зноў павялічыцца ў другім паўгоддзі 2024 года. Адбудзецца гэта зноў-такі дзякуючы чарговаму павышэнню ў краіне базавай стаўкі.
Паўлючэнка таксама адзначыла, што ўжо цяпер асобныя міністэрствы (напрыклад, Мінадукацыі і Мінпрацы) працуюць над дадатковым павелічэннем стымулюючых выплат асобным катэгорыям работнікаў па галінах, якія яны курыруюць.
Што ж тычыцца павышэння пенсій, то тут пэўнасці менш. Наталля Паўлючэнка толькі намякнула, што праводзяцца «фінансава-эканамічныя разлікі для вызначэння такой магчымасці».
Разлікі вядуцца сумесна з Міністэрствам фінансаў, а павысіць пенсіі хочуць яшчэ ў 2024 годзе. Аднак дакладныя тэрміны міністарка называць не стала.
Чытайце таксама:
Лукашэнка заявіў пра неабходнасць скарачэння дапамогі шматдзетным семʼям і іншых ільгот
