Беларускі таксіст у Варшаве ўрэзаўся ў групу пешаходаў
У варшаўскім раёне Макотаў адбылося сур'ёзнае ДТЗ, справакаванае, як сцвярджаецца, таксістам з Беларусі. Кіроўца Uber не саступіў дарогу аўтамабілю маркі BMW, паведамляе Most.
Скрыншот з відэа Miejski Reporter
Адбылося сутыкненне, у выніку якога BMW перакулілася, вылецела з дарогі і ўрэзалася ў групу пешаходаў. Раненні атрымалі шэсць чалавек, уключаючы кіроўцу BMW.
Як піша Gazeta Wyborcza, інцыдэнт адбыўся незадоўга да 15.00 у нядзелю, 9 чэрвеня. Таксіст Uber на аўтамабілі Toyota ехаў па вуліцы Пулаўскай, ён вёз пасажыра. На адным са скрыжаванняў пры павароце налева ён не прапусціў BMW, якая, па папярэдніх звестках, ехала з хуткасцю, што перавышае дапушчальную.
У выніку машыны сутыкнуліся. Ад удару BMW страціла кіраванне, вылецела з дарогі, знесла прыдарожны слуп і сметнік і ўрэзалася ў групу пешаходаў, якія пераходзілі вуліцу па пешаходным пераходзе. Пяцярых пешаходаў шпіталізавалі, у тым ліку дваіх — у цяжкім стане.
Кіроўца Toyota не пацярпеў, яго затрымалі і дапыталі, аднак абвінавачванні яму не прад'явілі. Паводле паведамлення рэсурсу Miejski Reporter, за рулём таксі быў грамадзянін Беларусі. Вадзіцеляў праверылі на алкаголь — абодва аказаліся цвярозымі. Абставіны справы высвятляе паліцыя Варшавы.
Чытайце таксама:
Беларускі дальнабойнік трапіў у смяротнае ДТЗ у Польшчы
Вынеслі прысуд беларусу, які год таму насмерць збіў раварыстку ў Познані
![Клас Клас](https://nashaniva.com/images/reactions/reaction-like.png)
![Панылы сорам Панылы сорам](https://nashaniva.com/images/reactions/reaction-facepalm.png)
![Ха-ха Ха-ха](https://nashaniva.com/images/reactions/reaction-smile.png)
![Ого Ого](https://nashaniva.com/images/reactions/reaction-omg.png)
![Сумна Сумна](https://nashaniva.com/images/reactions/reaction-sad.png)
![Абуральна Абуральна](https://nashaniva.com/images/reactions/reaction-anger.png)