Памерла Наталля Афанасьева. Яна праектавала Мінскі планетарый і сталічныя жылыя кварталы
Беларускай архітэктаркі і ўдавы Леаніда Левіна не стала 30 мая на 88-м годзе жыцця.
Наталля Афанасьева за працай. Фота: БСА
Пра гэта паведаміў Беларускі саюз архітэктараў.
Наталля Афанасьева нарадзілася 22 люты 1937 года ў расійскім горадзе Новакузнецку, што ў Кемераўскай вобласці.
У 1960 годзе скончыла Беларускі політэхнічны інстытут. Пасля працавала ў майстэрні генплана інстытута «Мінскпраект», а з утварэннем інстытута «Мінскграда» ў 1992 годзе перайшла ў яго разам з усёй майстэрняй.
З 1966 года была членам Саюза архітэктараў СССР.
Абсерваторыя ў мінскім парку імя Максіма Горкага. Фота: Гугл Карты
Да яе асноўных прац належаць праект Мінскага планетарыя і абсерваторыі ў парку імя М. Горкага (1964), праекты планіроўкі і забудовы сталічных жылых раёнаў Ракаўская шаша (1968), па вуліцах Аэрадромнай (1968), М. Горкага (1970), Паўднёвага Захаду (1976). Таксама прымала ўдзел у стварэнні генеральных планаў горада Мінска 1965, 1980 гадоў і ўсіх іх наступных карэктур.
За карэктуру генплана Мінска да 2000 года, якая была распрацавана ў 1982 годзе, аўтарскі калектыў атрымаў прэмію Савета Міністраў СССР.
Наталля Афанасьева з мужам Леанідам Левіным і дачкой Галінай. Фота: «Звязда»
Са сваім будучым мужам, Заслужаным архітэктарам Беларусі і старшынёй Саюза беларускіх яўрэйскіх грамадскіх аб’яднанняў і абшчын Леанідам Левіным, Наталля пазнаёмілася ў час вучобы. У іх нарадзілася дачка Галіна, якая пайшла па слядах бацькоў, стаўшы таксама вядомай архітэктаркай і дзяячкай яўрэйскай грамады ў Беларусі.
«Наша Нiва» — бастыён беларушчыны
ПАДТРЫМАЦЬ
