У Reform.by забіраюць дамен
Рэдакцыя незалежнага партала Reform.by атрымала ліст ад Аператыўна-аналітычнага цэнтра, што ААЦ прыняў рашэнне аб ануляванні запісу аб рэгістрацыі даменнага імя Reform.by. Ліст падпісаны 15 красавіка 2024 года.
Фота: Reform.by
«У сувязі з уключэннем у рэспубліканскі спіс экстрэмісцкіх матэрыялаў інфармацыйнай прадукцыі інтэрнэт-сайта, у якасці ідэнтыфікатара якога ўказана даменнае імя reform.by, адміністратарам нацыянальнай даменнай зоны прынята рашэнне ануляваць у цэнтралізаванай базе даных аб даменных імёнах, зарэгістраваных у нацыянальнай даменнай зоне, у тым ліку аб іх уладальніках, запіс аб рэгістрацыі даменнага імя reform.by», — паведамляе ў лісце № 4-5/2036 ад 15.04.2024 за подпісам намесніка кіраўніка ААЦ Сяргея Жарнасека.
Рашэнне аб ануляванні абавязаны выканаць рэгістратар hoster.by, а тэхнічны адміністратар даменнай зоны ТАА «Беларускія воблачныя тэхналогіі» павінна дадаць дамен у спецыяльны пералік, які фарміруецца і вядзецца ў складзе базы дадзеных.
Нагадаем, некалькі дзён таму ААЦ змяніў інструкцыю аб рэгістрацыі даменных імёнаў і цяпер «па законе» можа ануляваць рэгістрацыю даменаў, якія ўнесены ў спіс экстрэмісцкіх матэрыялаў.
Рэдакцыя пасля анулявання дамена ўключыць сайт на дамене reform.news. Ён таксама ўжо заблакаваны ў Беларусі, але непадкантрольны ўладам у Мінску.
А таксама прапануе падпісвацца ў сацсетках.
