На валгаградскім тэлебачанні назвалі месцы працы і імёны людзей, якія прыносілі кветкі ў памяць аб Навальным
Вядучы перадачы «Гутарка анлайн» на тэлеканале «Валгаград 1» Сяргей Мазанаў правёў, паводле яго слоў, «расследаванне» са сваёй камандай і вылічыў людзей, якія прыносілі кветкі пасля смерці Аляксея Навальнага да гарадскога помніка ахвярам палітычных рэпрэсій, піша The Insider.
Вядучыя перадачы «Гутарка анлайн» на тэлеканале «Валгаград 1»
Пасля гэтага ён зачытаў іх імёны і прозвішчы, а на экране зʼявіліся фатаграфіі людзей, месцы іх працы і спасылкі на асабістыя старонкі ў сацсетках.
Вядучы назваў помнік ахвярам рэпрэсій у Валгаградзе «месцам паломніцтва навальністаў». Паводле слоў Мазанава, яго «дзівіць» колькасць тых, хто «не проста прасякнуўся духам апазіцыйных ідэй, але адкрыта выказвае іх» у Валгаградзе.
У спісе аказаліся настаўнікі, супрацоўнікі банкаў і буйных кампаній. Вядучы пералічыў імёны больш за 15 чалавек, якія прыносілі кветкі да помніка, і сказаў, што «расследаванне яшчэ не скончана».
«Час прыйшоў: па сутнасці, Уладзімір Уладзіміравіч сказаў змагацца, вось мы сваімі метадамі будзем змагацца», дадаў вядучы.
Таксама Мазанаў выказаў сваё меркаванне аб Аляксеі Навальным, назваўшы яго «крымінальнікам»: «Чалавек, які адкрыта працуе на нашых ворагаў». «Там ніякай не было палітычнай справы. Ён абразіў ветэрана Вялікай Айчыннай вайны, да гэтага ён скраў з братам лес», — сказаў яго сувядучы ў эфіры.
У дзень развітання з Навальным у гарадах Расіі затрымалі 113 чалавек. У Маскве, дзе на пахаванне прыйшлі дзясяткі тысяч, тады затрымалі толькі 17 чалавек.
Чытайце таксама:
У дзень смерці Навальны паспеў адправіць маме сваёй жонкі паштоўку з віншаваннем з юбілеем
Крэмль адмаўляе перамовы аб абмене Навальнага: Была толькі вылучана ідэя
Пуцін пракаментаваў смерць Навальнага. І сказаў, што быў згодны яго абмяняць
