У Мінску прадаюць з аўкцыёну вядомую краму канфіскату. Цана пытання — $2,5 мільёна
Краму канфіскату «Ваш выбар» выставілі на таргі. Лот размешчаны на сайце Мінскага гарадскога цэнтра нерухомасці.
Фота: «Яндэкс.Карты»
Крама знаходзіцца на Ігуменскім тракце і належыць гандлёваму дому «Усходні» і ўваходзіць у сетку «Ваш выбар» (складаецца з дзевяці гандлёвых аб'ектаў), якая прадае канфіскаваныя тавары. Асартымент, якім гандлюе сетка, максімальна разнастайны — ад адзення да буйной бытавой тэхнікі.
Стартавы кошт за абсталяванае памяшканне плошчай 2800 кв.м — 8 179 347 рублёў, або $2,5 млн. Аўкцыён будзе на павышэнне, заяўкі плануюць прымаць да 17 красавіка. Таргі пройдуць 19 красавіка.
Акрамя канфіскату, канфіскаванага мытняй, міліцыяй і прыставамі, у крамах сеткі прадаюць звычайныя тавары ад прадпрыемстваў, падведаміла Кіраўніцтва справамі. «Ваш выбар» — не адзіная сетка крамаў канфіскату, якая дзейнічае ў Беларусі.
Чытайце таксама:
У Беларусі створаць яшчэ адну сетку крам па продажы арыштаванай маёмасці
