У Мінску спрабуюць прадаць закінутую грамадскую прыбіральню, каб зрабіць з яе кавярню. Цана не сімвалічная
На аўкцыённай пляцоўцы «Белрэалізацыя» з'явіўся цікавы лот, заўважыла Blizko.by. Называецца ён «капітальны будынак (пад рэканструкцыю) з інвентарным нумарам 500/C-21341», але за гэтым індэксам хаваецца старая і даўно закінутая грамадская прыбіральня.
Прыбіральня плошчай у 59 квадратных метраў знаходзіцца ў цэнтры горада, на вуліцы Пуліхава. Яна была пабудаваная ў далёкім 1966 годзе і спраўна працавала каля 30 гадоў, пасля чаго закрылася і заняпала.
У 2010 годзе будынак купіла прыватная кампанія «Абсалютінвестбуд» і пачала рэканструкцыю, але яна ўрэшце так і не скончылася, будынак дагэтуль абгароджаны і накрыты дзяругамі.
Увосень 2023 года яго ўжо спрабавалі прадаць з аўкцыёну за 250 тысяч рублёў (78 тысяч даляраў), але таргі не адбыліся, бо ніхто не захацеў купляць прыбіральню ўзросту больш чым у паўстагоддзя па цане двухпакаёвай кватэры.
Цяпер стартавая цана значна зменшаная: 100 тысяч рублёў (ці 31 тысяча даляраў). Таргі адбудуцца 29 сакавіка.
Адзначана, што ўзгодненыя папярэднія праектныя прапрацоўкі з Камітэтам архітэктуры Мінгарвыканкама, прычым плошча аб'екта пасля планавай рэканструкцыі складзе каля 1000 квадратных метраў. Мяркуецца, што новы ўладальнік зробіць тут кавярню.
Чытайце таксама:
Арыштаваную самую буйную сонечную электрастанцыю Беларусі не змаглі прадаць, бо нікому не трэба
У Гродзенскім гарвыканкаме расказалі, чаму знеслі казарму XIX стагоддзя
