Знайсці
21.09.2023 / 16:5749РусŁacБел

Абавязковае размеркаванне ўвядуць і для платнікаў, а бюджэтнікам павялічаць яго працягласць — нарада ў Лукашэнкі

Абмяркоўваецца павелічэнне тэрмінаў адпрацоўкі выпускнікоў ВНУ да пяці гадоў, а мэтавікоў — да сямі гадоў. Дыялог Аляксандра Лукашэнкі і міністра адукацыі на сённяшняй нарадзе пацвярджае інфармацыю, якую «Наша Ніва» мае ад сваіх крыніц. 

Нарада па адукацыі ў Аляксандра Лукашэнкі. Скрыншот з відэа тэлеграм-канала «Пул первого»

На нарадзе па пытаннях адукацыі між Аляксандрам Лукашэнкам і міністрам адукацыі Андрэем Іванцом адбыўся дыялог, з якога можна зразумець, што выпускнікоў беларускіх універсітэтаў чакаюць большыя тэрміны размеркавання. 

Відэа размясціла прэс-служба Лукашэнкі ў тэлеграм-канале «Пул первого». 

Аляксандр Лукашэнка пачаў з абурэння сістэмай размеркавання: «Што за сістэма такая? Скончыў ВНУ, не адпрацаваў і пайшоў». 

«Сёння і бюджэтнік, і платнік, па нашым меркаванні, павінны адпрацоўваць, — адказаў Іванец, — адпаведныя змены мы гатовыя ўнесці ў Кодэкс аб адукацыі». 

Міністр адукацыі дадаў, што яго ведамства перагледзела ў бок павышэння і выдаткі дзяржавы на падрыхтоўку спецыяліста. Ён прывёў у прыклад Беларускі дзяржаўны ўніверсітэт, дзе ў выніку пераразліку выйшла, што зараз студэнт-бюджэтнік, які захоча атрымаць дыплом, не адпрацаваўшы размеркавання, будзе вінаваты дзяржаве 40—45 тысяч рублёў. 

Лукашэнка працягнуў развіваць тэму адносна таго, што для краіны непрымальна, калі спецыялісты пасля ўніверсітэтаў з'язджаюць. 

«Настаўніка або медыка мы яшчэ на рабоце вучым, а яны з'язджаюць. Я лічу, тут павінна дзейнічаць забарона або паўзабарона. Ну, дапусцім, пяць гадоў.

«Мэтавік» — 5 гадоў (яно так ёсць і цяпер — Рэд.), а можа, недзе арыентавацца і на 7 гадоў», — загадаў Лукашэнка. 

А міністр Іванец агучыў аргумент, які чытаецца як абгрунтаванне ўвядзення абавязковага размеркавання і для платнікаў. 

«Сёння толькі 50—70% платнік кампенсуе за вучобу. У нас няма цалкам платнай адукацыі, у нас у рэальнасці паўплатная адукацыя», — сказаў ён. На гэтым відэа лукашэнкаўскай прэс-службы абрываецца. 

Трэба сказаць, што цалкам платнай адукацыі сапраўды няма: сістэма працуе так, што той, хто атрымлівае платную першую адукацыю, мае права на вяртанне падаходнага падатку па месцы працы, калі ён плаціць сам за сябе. Калі не сам, то такое права маюць бацькі або апекуны студэнта. 

Гэтая мера часткова стрымлівае абітурыентаў ад паступлення на платнае навучанне за мяжу, бо ў гэтым выпадку такую кампенсацыю яны атрымаць не могуць. 

Як «Нашай Ніве» вядома ад інфармаваных крыніц, цяпер рыхтуюцца змены ў механізм размеркавання студэнтаў — платнікі таксама будуць абавязаныя адпрацоўваць.

Магчыма, платнікаў абавяжуць адпрацоўваць адзін год, але, як кажуць у ведамствах, «Лукашэнка хацеў бы, каб гэта было больш чым год, ён увогуле супраць таго, каб выпускаць людзей з Беларусі, таму пакуль што мы гаворым пра тое, што магчыма ў моманце, а што не», — кажа суразмоўца «Нашай Нівы». 

Тэрміны адпрацовак для настаўнікаў і медыкаў пры мэтавым накіраванні могуць вырасці да сямі гадоў. Тэрмін звычайнага размеркавання можа вырасці да пяці гадоў. 

У канцы нарады Лукашэнка заявіў:

«Наконт адпрацоўкі мы вызначыліся. Тэрміны (ужо цяпер трэба насельніцтва акуратна інфармаваць пра гэта) мы павялічваем. Мы рыхтуем для сябе спецыялістаў. Мы падрыхтавалі, даём табе першае працоўнае месца — ідзі і працуй. Вось туды трэба, мы цябе туды накіроўваем».

Калі гэта здарыцца, Беларусь зробіць яшчэ адзін крок у кірунку прыгоннага права і да яшчэ большага кантролю дзяржавы над чалавекам.

Гэта таксама паказвае, што лукашэнкаўцы сутыкнуліся з праблемай дэфіцыту кадраў у выніку хвалі эміграцыі, выкліканай масавымі рэпрэсіямі і саўдзелам Беларусі ў вайне супраць Украіны.

«Наша Нiва» — бастыён беларушчыны

ПАДТРЫМАЦЬ

Nashaniva.com

Хочаш падзяліцца важнай інфармацыяй
ананімна і канфідэнцыйна?

Клас
Панылы сорам
Ха-ха
Ого
Сумна
Абуральна
23.09.2023
Вось вам і лукашыцкі Гулаг за вашыя ж грошы, хаха. Да кому оно нахр#н надо это образование (тем более колхозный его вариант). НИРАЗУ при приеме на работу не спросили диплом. Зато что бы пойти кассиром в банк сейчас требуют высшее образование, а у некоторых кассиров и не одно высшее. Ps я зарабатываю побольше кассира. И образование по идее мне надо высшее иметь… оно у меня даже есть. Но только знания из этого высшего образования они мертвые - никому не нужные.
2
Гертруда Заливайко /адказаць/
23.09.2023
Я,Ты дурачок если не понимаешь для чего нужно образование. Специалист из тебя и человек тоже будет амняный 
0
Woodoo Cult /адказаць/
25.09.2023
даведка, да наср...ь, даведка испалкомавская! Повестку в очко себе засунь!
Паказаць усе каментары
Каб пакінуць каментар, калі ласка, актывуйце JavaScript у наладах свайго браўзера
Каб скарыстацца календаром, калі ласка, актывуйце JavaScript у наладах свайго браўзера