Маравецкі: Польшча не дапусціць прымусовага перасялення мігрантаў
Прэм'ер-міністр Польшчы заявіў, што Варшава не дапусціць ні прымусовага перасялення мігрантаў, ні ўвядзення выплат з дзяржаў, якія адмовіліся прыняць мігрантаў.
Матэвуш Маравецкі. Фота: Andreea Alexandru / AP
Падчас прэс-канферэнцыі ён нагадаў, што Польшча прыняла мільёны ўцекачоў з Украіны, абараняючы межы ЕС ад штучна выкліканага міграцыйнага крызісу на мяжы з Беларуссю, паведамляе Польскае радыё.
Кіраўнік урада падкрэсліў, што Польшча ёсць цвёрдым прыхільнікам эфектыўнай абароны меж Еўрасаюза і не дазволіць «кантрабандыстам людзей дыктаваць Еўрасаюзу ўмовы».
«Мы выступаем за закрыццё меж, у тым ліку паўднёвай мяжы, і прадухіленне [ўзнікнення] вялікіх міграцыйных мас, як мы зрабілі на ўсходняй мяжы. Урад партыі «Права і справядлівасць» абараняе мір, спакой і бяспеку», — заявіў прэмʼер-міністр Матэвуш Маравецкі. Ён дадаў, што гэта пытанне абавязкова будзе абмяркоўвацца на саміце лідараў ЕС.
У сваім сённяшнім паведамленні ў Twitter кіраўнік урада таксама паведаміў, што Польшча не будзе плаціць за памылкі міграцыйнай палітыкі іншых краін. «Прымусовае перасяленне не вырашае праблем міграцыі, але парушае суверэнітэт дзяржаў-членаў», — гаворыцца ў допісе прэмʼер-міністра.
Учора міністры ўнутраных спраў краін Еўрасаюза пры пратэсце Польшчы і Венгрыі прынялі палажэнні міграцыйнага пакта. Ён змяшчае прынцып абумоўленасці: альбо краіны пагаджаюцца прыняць мігрантаў, якія прыбываюць у Паўднёвую Еўропу цераз Міжземнае мора, альбо яны будуць плаціць каля 20 тысяч еўра за кожнага непрынятага чалавека. Польшча крытыкуе гэта палажэнне і патрабуе, каб гэтым пытаннем займаліся лідары краін Еўрасаюза на саміце, бо там рашэнні прымаюцца аднагалосна.
