Расія на Сёмуху атакавала Кіеў беспілотнікамі і ракетамі
Усе яны былі збітыя.
Ілюстрацыйнае фота: Defence.ua
Усе ракеты і беспілотнікі, запушчаныя ў бок Кіева, былі збітыя СПА на далёкіх подступах да горада, паведаміў кіраўнік Кіеўскай гарадской ваеннай адміністрацыі Сяргей Папко.
Паводле яго слоў, ракеты былі традыцыйна запушчаныя з раёна Каспійскага мора расійскімі стратэгічнымі бамбардзіроўшчыкамі Ту-95МС.
«Паводле папярэдняй інфармацыі, у сталіцу ніводная паветраная цэль не даляцела. Усё, што накіроўвалася ў бок горада, СПА знішчыла яшчэ на далёкіх подступах. Другую ноч кіеўцы не чуюць гукаў выбухаў над галавой. Шчырая падзяка нашай супрацьпаветранай абароне за выратаваныя жыцці», — гаворыцца ў заяве Папко.
Ён таксама асудзіў Маскву за атаку на Сёмуху, якую праваслаўныя хрысціяне адзначаюць у гэтую нядзелю.
У ноч на нядзелю паветраная трывога была абвешчана ва ўсіх украінскіх рэгіёнах. Цяпер практычна ва ўсіх абласцях Украіны сігнал паветранай трывогі адменены, паведамляе Бі-бі-сі.
