Гэтыя дзве расліны — найлепшыя ачышчальнікі паветра
Мажліва, яны не вельмі папулярныя ў якасці хатніх раслін, але іх патэнцыял сапраўды ўражвае.
Выява: vecteezy
Адна з галоўных пераваг валодання пакаёвай раслінай — гэта натуральная сістэма фільтрацыі паветра. Тым не менш трэба разумець, што колькі б раслін не было ў вашай хаце, вельмі істотнага ўплыву на якасць паветра і зніжэнне канцэнтрацыі СО2 яны не акажуць.
У сувязі з гэтым усё больш стартапаў у заходніх краінах звяртае сваю ўвагу на фотааўтатрофы — арганізмы, якія не маюць каранёў, але выцягваюць пажыўныя рэчывы з навакольнага асяроддзя. Да такіх адносяцца мох і багавінне (ці водарасці).
Мох прыцягвае сёння вялікую ўвагу эколагаў. У той час як пасадка дрэў сёння — гэта даволі папулярнае рашэнне праблемы забруджанага паветра, сярэдняе дарослае дрэва можа паглынаць толькі каля 22 кг вуглякіслага газу ў год. Між тым мох так добра пераўтварае СО2 у кісларод, што мохавы газон сярэдняга памеру, па падліках The Oxygen Project, мог бы паглынаць столькі вуглякіслага газу, колькі 275 дарослых дрэваў.
Таму ўжо сёння на рынку з’яўляюцца прапановы сцен з жывога моху для чысцейшага гарадскога паветра, а кампаніі робяць ачышчальнікі паветра з кансерваванага моху і іншых натуральных паветраных фільтраў, напрыклад, какосавага валакна.
Тэхнічныя праблемы
Мох і багавінне лепш за ўсё растуць у натуральным асяроддзі. На адкрытым паветры мох можа добра расці ў цені, але ў доме яму патрабуецца больш святла і падтрыманне патрэбнай тэмпературы, каб прадухіліць загніванне. Захаваць жывы мох у памяшканні або на вуліцы больш за некалькі дзён — не самая простая задача. Таму большасць сённяшніх эфектыўных паветраных фільтраў з моху грувасткія і патрабуюць шмат паліву і электрычнасці.
Сёння, калі вы бачыце ў доме мох, то часцей за ўсё ён высушаны або закансерваваны. І хоць выглядае гэта даволі стылёва і прыемна, але амаль усе сцены з моху, апрацаваныя хімікатамі і афарбаваныя ў розныя колеры, у выніку не здольныя паглынаць столькі ж СО2, як здаровы жывы арганізм (хоць, як ні дзіўна, кансерваваны мох усё яшчэ можа фільтраваць паветра). Праз некаторы час такі мох лушчыцца, бляднее і патрабуе абслугоўвання або замены.
Якія варыянты існуюць ужо сёння
На гэты момант адна з самых папулярных кампаній па вытворчасці мохавых ачышчальнікаў паветра на рынку, бадай, Briiv, распавядае Inverse. У яе прадуктах выкарыстоўваецца 100-адсоткавы біяраскладальны кансерваваны мох, які паддаецца кампаставанню. Як сцвярджаецца на сайце кампаніі, у яе ачышчальніках выкарыстоўваецца 90 % прыродных і аднаўляльных матэрыялаў, а адна прылада забяспечвае выпрацоўку такой жа колькасці кіслароду, якую забяспечвалі б 3043 пакаёвыя расліны сярэдняга памеру.
Ачышчальнік паветра Briiv / Выява: Briiv
Прадукцыя кампаніі Moss Pure, наадварот, зробленая з жывога моху і не патрабуе паліву, сонечнага святла або дадатковага догляду. Па словах кампаніі, прадукты Moss Pure былі пратэставаныя на ачыстку паветра сертыфікаванай лабараторыяй у ЗША, і вынікі паказалі, што за дзве хвіліны ачышчальнік Moss Pure ачысціў паветра ад 30 адсоткаў вуглякіслага газу, а таксама ад пылу, алергенаў і вірусаў. Патэнт на тэхналогію брэнда зараз разглядаецца.
Прадукцыя кампаніі Moss Pure / Выява: Moss Pure
Багавінне вырабляе 60 % усяго кіслароду на планеце; шматлікія кампаніі ўжо вырошчваюць водарасці для ўлоўлівання вугляроду. Напрыклад, у амерыканскай кампаніі AlgenAir стварылі першы і пакуль адзіны спажывецкі прадукт на рынку (пад рамантычнай назвай Aerium) з выкарыстаннем багавіння для зніжэння ўзроўню СО2 у памяшканні.
Aerium працуе, запампоўваючы паветра ў шкляны кантэйнер, напоўнены мільярдамі дробнага мікрабагавіння. Святлодыёдны падсвет прылады забяспечвае бесперапынны фотасінтэз. Дзякуючы помпе, унутры падтрымліваецца цыркуляцыя вады і багавінне патрымліваецца жывым і рухомым. Пасля таго, як водарасці скончаць свой жыццёвы цыкл, змесціва Aerium можна выліць у вазоны ў якасці ўгнаення.
Ачышчальнік паветра Aerium / Выява: AlgenAir
Кампанія сцвярджае, што Aerium мае такую ж фотасінтэтычную здольнасць, як і 25 пакаёвых раслін, але кампанія на гэтым спыняцца не збіраецца і ўжо прэзентавала прататып устаноўкі магутнасцю больш за 5000 раслін.
Калі экалогія чамусьці вучыць нас, кажуць у кампаніі, дык гэта таму, што самыя маленькія аднаклетачныя арганізмы могуць уплываць на здароўе самых складаных формаў жыцця, у тым ліку і нас. Кампанія мае амбітныя планы, якія прадугледжваюць далейшае ўключэнне мікрабагавіння ў архітэктуру, выкарыстанне яго ў якасці біяпаліва або садовага ўгнаення, а ў перспектыве нават і для вырашэння глабальных харчовых праблем.
