Аршанец адсядзеў 10 сутак за тое, што публічна выгукнуў «Жыве Беларусь!» і «Слава Украіне!»
Суддзя суда Аршанскага раёна і горада Оршы Мікалай Драгуноў 18 мая пастанавіў арыштаваць на 10 сутак мясцовага жыхара Алега Масальскага за нібыта праведзены ім «пікет», піша «Віцебская вясна».
На судовым пасяджэнні Масальскі растлумачыў, што днём 7 мая ўжываў спіртныя напоі. Затым ён нібыта пайшоў на аўтобусны прыпынак, дзе сустрэў раней яму незнаёмага мужчыну ў вайсковай форме.
Вырашыўшы праверыць, як вайсковец ставіцца да падзей «у Беларусі і Украіне», Масальскі стаў нібыта выкрыкваць лозунгі «Жыве Беларусь!» і «Слава Украіне!».
Вайсковец на судзе пацвердзіў, што Масальскі знаходзіўся ў стане алкагольнага ап'янення, стаў нібыта да яго чапляцца, пры гэтым пачаў гучна выкрыкваць «апазіцыйныя лозунгі». А ён патэлефанаваў у міліцыю.
Суд кваліфікаваў дзеянні Масальскага як «пікет без атрымання адпаведнага дазволу Аршанскага райвыканкама». За гэта мужчыну пакаралі арыштам на дзесяць сутак па ч. 1 арт. 24.23 (Парушэнне парадку арганізацыі або правядзення масавых мерапрыемстваў) КаАП.
Чытайце таксама:
Прадпрымальніка асудзілі на 6 гадоў за перамяшчэнне з Расіі ў Беларусь зброі
