Грузінскі авіяперавозчык абвясціў прэзідэнта Грузіі персонай нон грата
Georgian Airways адмаўляецца абслугоўваць прэзідэнта Грузіі Саламэ Зурабішвілі, якая абвясціла байкот авіяперавозчыку праз аднаўленне палётаў у Маскву. Ад кіраўніцы дзяржавы патрабуюць выбачэнняў перад грузінскім народам.
Борт Georgian Airways. Фота: Wikimedia
Напярэдадні Зурабішвілі заклікала байкатаваць перавозчыка, які аднавіў авіязлучэнне з Масквой. Заснавальнік кампаніі Тамаз Гаяшвілі заявіў у нядзелю, 21 мая, што Зурабішвілі не будуць пускаць на борт самалётаў Georgian Airways.
«Спадарыня Саламэ абвясціла байкот нацыянальнай авіякампаніі, мы аб'яўляем яе персонай нон грата, і пакуль яна не прынясе прабачэнні грузінскаму народу, не пусцім яе на борт», — прыводзяць заяву Гаяшвілі мясцовыя СМІ, перадае DW.
Напярэдадні, пасля таго, як Georgian Airways выканала першы пасля аднаўлення авіязлучэння з Расіяй рэйс з Тбілісі ў Маскву, Саламэ Зурабішвілі паабяцала «ўстрымлівацца ад выкарыстання борта да таго часу, пакуль ён знаходзіцца ў руках Georgian Airways, каб не ўзбагачаць кампанію». Яна заклікала суграмадзян далучыцца да байкоту.
Чытайце таксама:
У Грузію прыляцеў першы самалёт з Расіі
