«Мы будзем пераглядаць свае запісы па меры магчымасцяў». Амерыканская ўстанова адказала на беларускі запыт адносна змены подпісаў пра паходжанне мастакоў
Беларуская рада культуры атрымала адказ ад Нацыянальнай галерэі мастацтва ў Вашынгтоне на свой запыт адносна змены подпісаў пад работамі мастакоў беларускага паходжання. Беларусы хочуць, каб пра выхадцаў з Беларусі пісалі менавіта так, а не як пра выхадцаў з Расіі ці Польшчы.
Партрэт Марка Шагала. Мазаіка Надзеі Хадасевіч-Лежэ
Запыт зрабіў дырэктар БРК па справах культурніцкай дыпламатыі Алесь Чахоўскі падчас свайго асабістага візіту ва ўстанову і сустрэчы з яе кіраўніцтвам. Цяпер ён атрымаў ліст ад кіраўніка аддзела калекцый выяваў галерэі Грэгары Моста.
Алесь Чахоўскі ў Нацыянальнай галерэі мастацтва ў Вашынгтоне
«Тэма абнаўлення нацыянальнасцяў мастакоў апошнім часам актыўна абмяркоўваецца ў бібліятэках і музеях свету і заўсёды прадстаўляла шмат складанасцяў.
Мастакі, якія нарадзіліся ў адной краіне, працавалі ў розных мясцінах і мянялі сваё грамадзянства. Змяняліся геаграфічныя межы. Мы будзем пераглядаць свае запісы па меры магчымасцяў.
Спадзяюся, Беларуская рада культуры дапаможа ў стварэнні паказальніка беларускіх мастакоў, які будзе выкарыстоўвацца як даведка для ўсіх музеяў і бібліятэк», — напісаў у сваім лісце адказны супрацоўнік амерыканскай культурнай установы.
Чытайце таксама:
Беларуская рада культуры пачала кампанію па адвакацыі беларускага мастацтва за мяжой. Першы — Шагал
Шагал, Суцін, Бакст… Што зрабіць, каб свет пачаў іх лічыць выхадцамі з Беларусі?
