У Беларусі значна павялічылася колькасць выпадкаў гібелі капытных у ДТЗ, за адны суткі — 33 жывёліны
У Беларусі адзначаецца значны рост ДТЗ, у выніку якіх гінуць капытныя дзікія жывёлы, паведамілі ў Беларускім таварыстве паляўнічых і рыбаловаў (БТПР).
Здымак ілюстрацыйны
Толькі за адны суткі, з 12 па 13 мая, дзяжурная служба Дзяржінспекцыі выявіла 33 такія выпадкі — гэты паказчык стаў максімальным за ўвесь перыяд фіксацыі дзяржінспектарамі краіны падобных фактаў.
Усяго са студзеня па красавік у Беларусі было зарэгістравана ўжо 943 ДТЗ з удзелам жывёл. У выніку загінулі або былі траўмаваныя 963 капытныя жывёліны — 149 ласёў, 17 высакародных аленяў, 761 казуля, дзікі, 2 лані. Гінуць, праўда, не толькі капытныя — сярод ахвяраў ёсць нават два бабры.
БТПР сцвярджае, што за чатыры месяцы бягучага года было зафіксавана амаль напалову больш (+48,7%) ДТЗ з удзелам жывёл, чым за такі ж перыяд 2022 года, а паказчык да 2021-га павялічыўся на 27,8% (+205 выпадкаў).
Часцей за ўсё, пад коламі аўтамабіляў сталі аказвацца казулі.
«Так, у студзені-красавіку 2023 года ў выніку ДТЗ загінула на 288 казуль больш (+60,9%), чым у аналагічным перыядзе 2022 года і на 240 жывёл больш (+46,1%) у параўнанні з 2021 годам», — расказалі ў БТПР.
У ведамстве мяркуюць, што такая тэндэнцыя абумоўленая перш за ўсё тым, што ў Беларусі вырасла папуляцыя казулі — гэтаму спрыялі адносна мяккія зімы апошніх гадоў.
Найбольш жывёлы гінуць на аўтадарогах агульнага карыстання — 95,7%. На чыгунцы зафіксавана ўсяго 38 такіх выпадкаў. Найбольш небяспечныя для жывёл — трасы М-1, М-2, М-3, М-4, М-6, М-7 і М-8.
Чытайце таксама:
Рысь на трасе: як звяры трапляюць у пастку на дарогах
Раніцай праз мост цераз Дняпро ў Магілёве прыгожа прабеглі тры ласі ВІДЭА
