Ігар Сечын можа набыць Прыёрбанк
Як стала вядома «Нашай Ніве», апошні вялікі беларускі банк з заходнім капіталам можа трапіць у рукі «Раснафты».
Ігар Сечын. Фота: kremlin.ru
Месяц таму ў заходняй прэсе паведамлялася пра магчымасць абмену аўстрыйскіх актываў расійскага СберБанка ў Еўропе на актывы банкаўскай групы Raiffeisen у Расіі. У абедзвюх арганізацый «падвіслі» актывы ў варожых юрысдыкцыях.
Аўстрыйскае выданне Der Standard выказвала здагадку, што пад абмен можа трапіць і беларуская дачка «Райфайзена» — Прыёрбанк. Гэта, аднак, была гіпатэтычная інфармацыя. Як расказалі «Нашай Ніве» людзі з банкаўскага сектара, здзелка па апісанай схеме наўрад ці адбудзецца: такая аперацыя заскладаная для ажыццяўлення.
Замест гэтага Raiffeisen Bank International спрабуе проста прадаць свае актывы ў Расіі, а разам з гэтым, па нашай інфармацыі, — і ў Беларусі.
Расійскія актывы групы Raiffeisen Bank International уключаныя ў адпаведны спіс і не могуць быць прададзеныя без згоды Уладзіміра Пуціна, а кан'юнктура вымагае вялікай зніжкі, што ўплывае на асобы інтарасантаў.
«Самы імаверны кандыдат на куплю — структуры Ігара Сечына (кіраўніка «Раснафты»). У «Раснафты» ёсць свой банк «ВБРР». Узбуйніцца за кошт «Райфайзена», яшчэ і з вялікім дысконтам, — прывабны варыянт для «Раснафты».
Кіраўнік Прыёрбанка Сяргей Касцючэнка. Фота: Bspu.by
Беларускі Прыёрбанк ідзе прычэпам да расійскай дачкі аўстрыйскай групы і будзе прададзены той жа кампаніі, якая купіць расійскі актыў, паасобку яны не разглядаюцца», — паведамілі «Нашай Ніве» суразмоўцы ў банкаўскіх колах.
Тэрміны і ўмовы ўгоды пакуль не паведамляюцца.
Пры гэтым беларускі Прыёрбанк з 15 мая спыняе даляравыя аперацыі па сваім карэспандэнцкім рахунку ў амерыканскім Сіцібанку.
Перавесці даляры зараз можна толькі праз армянскі, азербайджанскі, казахстанскі і кітайскі банкі, якія прымаюць плацяжы толькі ў бок рэзідэнтаў сваіх краін.
Акрамя таго, з 1 чэрвеня Прыёрбанк уводзіць касмічную месячную камісію ў 750 рублёў за абслугоўванне тых рахункаў, на якіх на канец месяца знаходзіцца больш за 50 тысяч даляраў ці еўра.
Прыёрбанк — трэці па памеры банк Беларусі. 87,74% ягоных акцый належыць аўстрыйскай Raiffeisen Group.
Сам банк да поспеху прывёў яго заснавальнік і шматгадовы кіраўнік Сяргей Касцючэнка. У ліпені 2022 года лукашэнкаўцы асудзілі яго да 3 гадоў пазбаўлення волі. За выхад на волю ён быў вымушаны выплаціць больш за 10 мільёнаў даляраў. Пасля вызвалення ён пакінуў краіну.
Ігар Сечын — асабісты сябар Уладзіміра Пуціна, у мінулым яго калега па КДБ, а падчас ягонага прэзідэнцтва — шматгадовы кіраўнік расійскай карпарацыі «Раснафта», адзін з самых багатых і ўплывовых людзей Расіі.
«Раснафце» ў Расіі належыць банк «ВБРР», што расшыфроўваецца як «Усерасійскі банк развіцця рэгіёнаў», які абслугоўвае справы кампаніі.
Ацаніць цяперашні аб'ектыўны кошт беларускага Прыёрбанка праблематычна ў турбулентных умовах вайны, санкцый і лукашэнкаўскіх рэпрэсій. Звычайна банкі ў Беларусі і свеце прадаюцца па цане блізкай ці меншай за суму ўласнага капіталу.
Парытэтбанк быў прададзены за 50 мільёнаў пры ўласным капітале 46 мільёнаў даляраў, але гэта вынятак з правілаў — за банк рэдка даюць больш, чым складае яго ўласны капітал.
Франсабанк у 2021-м выкупілі за 27 мільёнаў рублёў, Ідэябанк — за 50 мільёнаў.
Уласны капітал Прыёрбанка вагаецца паміж 400 і 450 мільёнамі даляраў. Аднак у сённяшніх умовах дысконт можа скласці да 80%, сказалі «Нашай Ніве» людзі з банкаўскага сектара.
Прыёрбанк — апошні вялікі банк з заходнім капіталам у Беларусі. Ёсць яшчэ БСБ-Банк і Цэптарбанк, якія маюць бенефіцыяраў у Швейцарыі, але па факце кіруюцца беларусамі праз свае юрыдычныя асобы ў альпійскай канфедэрацыі.
Аляксандр Лукашэнка нават у перыяд так званага балансавання між Расіяй і Захадам блакаваў спробы іншых заходніх банкаў прыйсці ў Беларусь. У выпадку продажу Прыёрбанка ў краіне застануцца вялікія банкі толькі або дзяржаўныя, або з расійскім капіталам. Сярод апошніх — СберБанк, БелВЭБ, Белгазпрамбанк і Альфа-банк.
Чытайце таксама:
Дзяржбанкі перасталі публікаваць гадавую фінансавую справаздачнасць
Стаўкі па валютных дэпазітах у беларускіх банках рэзка змяніліся проці мінулага года
