Вялікабрытанія заблакавала трансляцыю выступу Львовай-Бяловай у Радзе Бяспекі ААН словамі «Хай выступае ў Гаазе»
У сераду ўпаўнаважаная ў правах дзіцяці пры прэзідэнце Расіі Марыя Львова-Бялова, абвешчаная ў вышук Міжнародным крымінальным судом у Гаазе разам з самім Уладзімірам Пуціным, павінна выступіць на пасяджэнні Рады Бяспекі ААН, дзе ў гэтым месяцы старшынюе Расія. Менавіта расійская дэлегацыя арганізавала нефармальнае пасяджэнне на тэму «эвакуацыі дзяцей з зоны канфлікту» і запрасіла Львову-Бялову, паведамляе Радыё Свабода.
Аднак Вялікабрытанія настаяла на тым, каб ніякай відэатрансляцыі гэтага пасяджэння не было, паведаміла брытанская дэлегацыя ў твітар-акаўнце. Брытанскі пасол таксама адмовілася прысутнічаць на гэтым пасяджэнні асабіста. «Калі спадарыня Львова-Бялова хоча расказаць пра свае дзеянні, яна можа зрабіць гэта ў Гаазе», — заявіла брытанская місія.
Як адзначае New York Times, блакаванне трансляцыі азначае, што ніякі відэазапіс не будзе захаваны на сайце ААН і пастфактум. Для трансляцыі патрабуецца згода ўсіх 15 членаў Рады Бяспекі, пастаянных або часовых, і пярэчанні бываюць рэдка. Зрэшты, па даных газеты, у мінулым месяцы Кітай падобным чынам заблакаваў трансляцыю пасяджэння, прысвечанага парушэнням правоў чалавека ў Паўночнай Карэі.
Намеснік пастаяннага прадстаўніка Расіі пры ААН Дзмітрый Палянскі напісаў у твітары, што Расія арганізуе альтэрнатыўную трансляцыю выступу Львовай-Бяловай.
Таксама ён прыгразіў, што Расія будзе разглядаць гэты выпадак як прэцэдэнт, каб блакаваць трансляцыі абмеркаванняў, ініцыяваных заходнімі краінамі. Заходнія краіны ў апошнія месяцы неаднаразова арганізоўвалі пасяджэнні, прысвечаныя, напрыклад, зверствам расійскіх войскаў ва Украіне.
У Міжнародным крымінальным судзе выдалі ордар на арышт Уладзіміра Пуціна
