Знайсці
29.03.2023 / 13:29РусŁacБел

Жонка Бяляцкага: «Алесь варты Беларусі». У Вільні прэзентавалі кнігі пра яго

У Польшчы і Літве працягваюцца тыдні салідарнасці з Алесем Бяляцкім. Адно з прымеркаваных мерапрыемстваў — прэзентацыя кніг пра нобелеўскага лаўрэата, што адбылася 28 сакавіка ў віленскім Цэнтры беларускай культуры і супольнасці.

Кнігі прэзентавалі кіраўніца Беларускага ПЭНа Таццяна Нядбай, жонка Бяляцкага Наталля Пінчук і журналіст Валерый Каліноўскі

Прэзентавалі, перш за ўсё, кнігу выбраных тэкстаў Алеся Бяляцкага, сабраную намаганнямі Беларускага ПЭНа, а таксама кнігу «Алесь Бяляцкі на Свабодзе», выпушчаную «Радыё Свабода», у якой сабраны выказванні, інтэрв’ю і ацэнкі вясноўца.

Імпрэзу наведалі жонка Бяляцкага Наталля Пінчук, а таксама Таццяна Нядбай, адна са складальніц першай з кніг і кіраўніца Беларускага ПЭНа, сябры і калегі Алеся. Прагучаў голас і самога Бяляцкага, праўда, у відэазапісе, зробленым за некалькі месяцаў да арышту. Вось некалькі слоў з той прамовы:

«І мы не чакалі таго маштабу рэпрэсій, які абрынуўся на беларускую грамадзянскую супольнасць у жніўні 2020 года і працягваецца да сёння. Забойствы, сотні параненых, тысячы людзей, якія прайшлі праз катаванні і здзекі. Лукашэнка і яго атачэнне праігнаравалі справядлівае патрабаванне мільёнаў беларусаў аб правядзенні сумленных выбараў, пакаранні вінаватых у злачынствах супраць чалавечнасці і аб вызваленні палітычных зняволеных. У краіне прававы дэфолт і фактычна неабвешчанае ваеннае становішча».

Наталля Пінчук адказала на некалькі пытанняў з залы. Бадай, самае важнае з іх гучала так: «Ці дастойная Беларусь Алеся Бяляцкага? Такое адчуванне, што ёсць невялічкая група тых, каму трэба, а ёсць усе астатнія, каму пляваць». Вось што адказала Наталля:

«Мабыць, варта гэта ўсё памяняць месцамі. Думаю, Алесь варты Беларусі, бо Беларусь — тое, за што варта змагацца ўсімі сіламі, усімі сродкамі і хто як можа. І толькі вось гэтымі дзеяннямі мы можам нешта зрабіць.

Давайце пры ўсім пры тым старацца больш са спагадай ставіцца да іншых, на наш погляд, можа, не зусім такіх важных і лёсавызначальных падзей ці мерапрыемстваў, якія арганізуюцца. Усе мы людзі, і кожны ўсё робіць як умее, і ўмеюць людзі вельмі па-рознаму. Галоўнае, каб мы працавалі і каб мы ішлі ў адным кірунку».

Мовазнаўца Вінцук Вячорка згадаў адну гісторыю пра Бяляцкага. Паводле Вячоркі, у Мірскім замку каля правай франтальнай вежы закапана прысяга, якую даў Алесь Бяляцкі сорак гадоў таму:

«Ён прысягнуў усё жыццё змагацца за незалежнасць Беларусі супраць савецкай імперыі і барацьбу гэтую перадаць дзецям і ўнукам. Нягледзячы на ўсе рэстаўрацыйныя працы ў Мірскім замку і раскопкі, якія там былі, бутэлька тая з прысягай засталася на сваім месцы. Упэўнены, што яна такім ірацыянальным чынам таксама дапамагае яму выстаяць».

Мовазнаўца Вінцук Вячорка

Гаварылі і пра тое, ці не зможа Алесь стаць першым прэзідэнтам новай Беларусі, бо чалавек ён сумленны і аўтарытэтны. Відаць, разам з таямнічай прысягай гэтае сумленне і маральны стрыжань — якраз тыя рэчы, што дапамагаюць беларускаму нобелеўцу захаваць сябе ў вязніцы. І тыя, што зрабілі яго легендай.

«Наша Нiва» — бастыён беларушчыны

ПАДТРЫМАЦЬ

«Гэта маральны аўтарытэт». Мілінкевіч расказаў, хто павінен быць прэзідэнтам краіны ў пераходны перыяд. І назваў імя

«Без нацыянальнага прымірэння нам не захаваць незалежнасці Беларусі». Іосіф Сярэдзіч выступіў са смелым адкрытым лістом

Кнігу пра Алеся Бяляцкага можна купіць на Allegro

Nashaniva.com

Хочаш падзяліцца важнай інфармацыяй
ананімна і канфідэнцыйна?

Клас
Панылы сорам
Ха-ха
Ого
Сумна
Абуральна
Каб пакінуць каментар, калі ласка, актывуйце JavaScript у наладах свайго браўзера
Каб скарыстацца календаром, калі ласка, актывуйце JavaScript у наладах свайго браўзера