Выкладчыка Полацкага ўніверсітэта аштрафавалі за «пікет» у фэйсбуку
Як стала вядома «Віцебскай Вясне», суд Наваполацка 8 лютага прызнаў выкладчыка Полацкага дзяржуніверсітэта Аляксандра Камка вінаватым у правядзенні пікета і аштрафаваў яго на 3700 рублёў.
Падчас судовага пасяджэння было ўстаноўлена, што Аляксандр Мікалаевіч без атрымання дазволу мясцовых уладаў нібыта «прыняў удзел у несанкцыянаваным масавым мерапрыемстве — пікетаванні». Як «пікетаванне» была кваліфікаваная публікацыя ў сацсетцы свайго фота з выявай сцяга Украіны і БЧБ-сімволікі.
Мужчына сваёй віны ў «пікетаванні» не прызнаў, хоць самога факта размяшчэння фатаграфіі не адмаўляў.
Аднак суддзя прыйшла да высновы, што фотаздымак, маўляў, размешчаны выкладчыкам універсітэта з мэтай прыцягнення ўвагі іншых грамадзян да падзей ва Украіне, таму гэта пікет.
