У Гродне былога сілавіка асудзілі да 10 гадоў калоніі за «здраду дзяржаве»
У Гродзенскім абласным судзе 2 сакавіка асудзілі палітзняволенага былога інспектара крымінальна-выканаўчай інспекцыі мясцовага РАУС Андрэя Шкляра, паведамляе «Вясна».
Яго абвінавацілі паводле двух артыкулаў Крымінальнага кодэкса: ч. 1 арт. 356 (здрада дзяржаве) і арт. 407 (разгалошванне даных папярэдняга следства ці закрытага судовага пасяджэння). Суддзя Васіль Скок прызначыў яму 10 гадоў калоніі ва ўмовах узмоцненага рэжыму і штраф у памеры 200 базавых велічынь (7 400 рублёў).
Суд праходзіў у закрытым рэжыме, таму падрабязнасці справы невядомыя. Па справе адбылося пяць судовых пасяджэнняў.
Вядома, што мужчына быў затрыманы ў снежні 2021 года і ўжо больш за год знаходзіцца за кратамі. Андрэй працаваў інспектарам крымінальна-выканаўчай інспекцыі Кастрычніцкага РАУС Гродна, незадоўга да арышту падаў рапарт на звальненне з-за нязгоды з тым, як працуе сістэма.
Падтрымайце палітвязня: Турма № 1, 230023, Гродна, Кірава, 1, Андрэй Віктаравіч Шкляр.
