Падымаць футбол даручаць аграрыю-гіравіку — «Трыбуна»
22 сакавіка ў Доме футбола пройдзе справаздачна-выбарная канферэнцыя, дзе назавуць імя таго, хто будзе кіраваць гэтым відам спорту наступныя некалькі гадоў. І «Трыбуне» ўжо вядома, хто з вялікай доляй верагоднасці ўзначаліць АБФФ.
Адносна таго, хто можа ўзначаліць адну з самых ключавых спартыўных федэрацый у Беларусі, даўно ходзіць шмат чутак і версій. Называліся імёны і Сяргея Кавальчука, і Сяргея Румаса, і Ігара Петрышэнкі, і цяперашняга старшыні Уладзіміра Базанава.
А на пачатку сакавіка, згодна са статутам федэрацыі, скончыўся прыём заявак на ўдзел у выбарах. 65-гадовы Базанаў хоць і вылучаны, але, відаць, усё ж пакіне пасаду. Па інфармацыі «Трыбуны», альбо за некалькі дзён да выбараў, альбо непасрэдна ў дзень канферэнцыі ён мае намер адклікаць сваю кандыдатуру, а ўзамен атрымае пасаду першага намесніка федэрацыі. А пасля гэтага адзіным кандыдатам застанецца той чалавек, які і стане кіраўніком.
Гэтая кандыдатура ўзнікла вельмі нечакана — 62-гадовы чыноўнік Мікалай Шарснёў. Пра тое, што ён практычна са стапрацэнтнай верагоднасцю будзе новым старшынёй АБФФ, «Трыбуне» паведамілі некалькі крыніц, якія не звязаныя паміж сабой.
Ураджэнец вёскі Прыгузкі Аршанскага раёна — патомны і прафесійны аграрый, ён у 1983 годзе скончыў зааінжынерны факультэт Віцебскай дзяржаўнай акадэміі ветэрынарнай медыцыны па спецыяльнасці «Заатэхнія». Пасля тры дзесяцігоддзі працаваў на кіраўнічых пасадах у калгасах і іншых аграпрадпрыемствах, займаў чыноўніцкія пасады сярэдняга звяна ў аграрнай сферы, узначальваў «Белптушкапрам» i «Мінаблптушкапрам», з 2012-га па 2014-ы з'яўляўся генеральным дырэктарам 1-й Мінскай птушкафабрыкі.
У верасні 2014-га Шарснёў быў прызначаны памочнікам Лукашэнкі па Віцебскай вобласці, а літаральна праз некалькі месяцаў стаў старшынёй Віцебскага аблвыканкама, дзе працаваў да канца 2021-га. Указам Лукашэнкі ён быў адпраўлены ў адстаўку ў адзін дзень са старшынёй рэжымнай ЦВК Лідзіяй Ярмошынай.
Пасля гэтага Шарснёва адправілі ў Акадэмію навук, дзе ён дагэтуль займае пасаду начальніка галоўнага ўпраўлення інвестыцыйна-вытворчай дзейнасці і адміністрацыйна-гаспадарчых пытанняў.
Да футбола непасрэднага дачынення Шарснёў дагэтуль не меў, але раней меў поспехі ў гіравым спорце, ды і да гэтага часу ўдзельнічае ў спаборніцтвах па жыме штангі лежачы і падыманні гіры. У 2017 годзе ён нават устанавіў рэкорд Беларусі для свайго ўзросту ў жыме штангі лежачы. Больш за тое — у лістападзе 2019-га Шарснёў у складзе зборнай Беларусі ўдзельнічаў у чэмпіянаце свету па гіравым спорце, які праходзіў у Гродне, дзе падняў 32-кілаграмовы снарад 53 разы за адну хвіліну і стаў з рэкордам спаборніцтваў чэмпіёнам свету ў сваёй узроставай катэгорыі.
Прыход Шарснёва ў АБФФ — нібыта, ініцыятыва зверху. Адтуль, кажуць, прыйшло распараджэнне знайсці чыноўніку «больш годную пасаду, чым цяпер у НАН».
Адносна іншых пасад у АБФФ, прагназуецца, што сябар Базанава Юрый Вяргейчык страціць пасаду першага намесніка старшыні і сканцэнтруецца на працы старшынёй федэрацыі футбола Мінска, якім «абраны» ў красавіку 2022 года.
А адным з намеснікаў Шарснёва нібыта плануюць зрабіць былую футбольную зорку Аляксандра Глеба, які засведчыў сябе ў апошнія гады як непахіснага прыхільніка рэжыму. Пакуль, праўда, запланавана, што Глеб будзе выконваць больш прадстаўнічыя функцыі. «Стане гаворачай галавой», — кажуць крыніцы «Трыбуны», гэта значыць, будзе прадстаўляць АБФФ на розных мерапрыемствах унутры краіны і за яе межамі.
Месца для Глеба нібыта мае вызвалiць 73-гадовы Міхаіл Вергяенка, а вось экс-супрацоўнік аховы Лукашэнкі Міхаіл Ботнікаў застанецца Шарснёву ў спадчыну ад базанаўскіх часоў.
Таксама ў сценах АБФФ актыўна ходзяць размовы пра тое, што зменіцца і прэс-сакратар федэрацыі. Гэтую пасаду ўжо даўно займае 34-гадовы Аляксандр Алейнік, чый бацька Сяргей Алейнік з 13 снежня 2022 года ўзначальвае Міністэрства замежных спраў Лукашэнкі.
З высокай доляй верагоднасці Алейнік-сын пасля выбараў у федэрацыі пойдзе на павышэнне — стане генеральным сакратаром АБФФ. Цяпер гэтую пасаду займае 39-гадовы Сяргей Жардзецкі.
