Украінскі трэнер, які называў Лукашэнку дыктатарам, ледзь не ўзначаліў беларускі клуб
Пра персону, якая магла стаць новым галоўным трэнерам брэсцкага гандбольнага клуба «Мяшкоў», піша «Трыбуна».
Фота: прэс-служба гандбольнага клуба «Мяшкоў Брэст»
У лютым 2023-га ў Брэсце быў нечакана заўважаны ўкраінскі спецыяліст Сяргей Бябешка (цяпер ён жыве ў Іспаніі).
Гэта быў не проста візіт па старой памяці ў горад, дзе Бябешка трэніраваў з 2015-га па 2018-ы. Трэнер мог зноў узначаліць «Мяшкоў» і нават быў да гэтага блізкі, але пагадненне сарвалася.
Гэта здзіўляе найперш праз тое, якую пазіцыю Бябешка заняў пасля пачатку вайны ва Украіне. Тады коўч, які ўзначальваў расійскі клуб «Данскія казакі — ЮФУ», адразу ж яго пакінуў, а затым даў інтэрв'ю «Трыбуне», дзе выразна выказаўся супраць баявых дзеянняў рэжыму Пуціна, а заадно закрануў і беларускую тэматыку.
Бябешка сказаў, што на выбарах у нашай краіне «малююць працэнты яшчэ да пачатку галасавання», людзі пасля іх «пратэставалі, малайцы», а поспеху не дабіліся, таму што «вакол дыктатура, і дыктатары ў крыві могуць утапіць народ».
Ды і проста абвінаваціў Лукашэнку ў хлусні па тэме саўдзелу ў вайне. Той факт, што беларускія гандбалісты аддаюць перавагу па ўсіх гэтых нагодах маўчаць, трэнера «засмучваў», бо, на яго думку, «проста назіраць — гэта няправільна».
У студзені 2023-га выйшла яго інтэрв'ю «Люстэрку», дзе трэнер ізноў заявіў, што «Пуцін і Лукашэнка — адназначна дыктатары», а ў беларускіх спартоўцаў «у асноўным «хата з краю», гэта «няшчасныя людзі з баязлівасцю».
Пры такой рыторыцы трэнер разглядаў варыянт з Брэстам. Чаму ён сарваўся, можна толькі здагадвацца.
