Памерла мастачка Марына Несцярук
Вядомай магілёўскай мастачкі Марыны Несцярук не стала 15 лютага пасля працяглай хваробы сэрца, паведамляе Магілёў.Media.
Марына Уладзіміраўна Несцярук працавала мастаком Музея гісторыі Магілёва, была сябрам Саюза мастакоў Беларусі, аўтарам шматлікіх мастацкіх выстаў. Апошняя яе выстава «Клумбавосень» адкрылася ў Выставачнай зале Магілёва ў лістападзе мінулага года.
Марына Несцярук — аўтарка габеленаў, якімі ўпрыгожаная ратуша Магілёва, жыццярадасных і натхняльных мастацкіх палотнаў, што шмат разоў былі прадстаўленыя на найлепшых выставах у Магілёве і ў Беларусі.
Габелен Марыны Несцярук «Анёл з сэрцам Хрыста і гербам Магілёва», створаны паводле малюнка невядомага мастака XVII стагоддзя, у Магілёўскай ратушы
Яна таксама вылучалася выбітным пачуццём выставачнай экспазіцыі: калегі і прафесіяналы вылучалі яе як адну з найлепшых у краіне па мастацтве стварэння выстаў.
Раней Несцярук узначальвала магілёўскае аддзяленне Саюза мастакоў Беларусі.
Муж мастачкі — таксама вядомы магілёўскі мастак Юрый Несцярук, мастацтвам займаецца і сын Леанід — адзін з музыкаў знакамітага гурта Nizkiz.
