Як схаваць, што ты данаціў праз фэйсбук? Валерый Цапкала і Андрэй Стрыжак маюць розныя меркаванні
Беларусаў масава выклікаюць у КДБ за ахвяраванні ў фонды салідарнасці. Сваімі думкамі наконт таго, якім чынам можна абараніцца ад «выкупу» за ахвяраванні ў фонды двухгадовай даўніны, якія рабіліся праз Facebook, падзяліліся Валерый Цапкала і Андрэй Стрыжак.
Валерый Цапкала і Андрэй Стрыжак. Фота: wikimedia.org
Валерый Цапкала ў сацсетках апублікаваў вялікі допіс пра ахвяраванні. Ён скардзіцца на тое, што арганізатары дабрачынных збораў не схавалі старонкі збораў і сілавікі бачаць тых, хто ахвяраваў у фонды і пазначыў ахвяраванне як «даступнае ўсім». Сэнс допісу Цапкалы ў тым, што калі б арганізатары схавалі старонкі, то сілавікі не здолелі б так масава выклікаць людзей, якія ахвяравалі грошы ў фонды ў 2020-м.
Адна з парад Цапкалы — беларусы, якія ахвяравалі праз фэйсбук, могуць самі заблакаваць старонкі арганізатараў збораў і гэтым самым схаваць факт свайго даната. У такім выпадку вашы сябры і знаёмыя сапраўды перастануць бачыць вас у спісах ахвярадаўцаў (але даныя пра вашы ахвяраванні з асабістага кабінета фэйсбука нікуды не знікнуць).
Каб заблакаваць старонку, трэба зайсці ў фэйсбук з камп'ютара ці браўзера ў рэжыме камп'ютара — з мабільнай праграмы зрабіць гэта папросту немагчыма. Пасля зайдзіце на старонку арганізатара збору, спачатку націсніце сімвал меню (•••), а потым «Заблакаваць».
Мы спыталі ў Андрэя Стрыжака з фонду BySol пра тое, чаму арганізатары не «хаваюць» старонку збору. Ён адказаў:
«Праблема з парадамі спадара Валерыя ў тым, што яны не спрацуюць. Да прыкладу, у фэйсбуку не існуе магчымасці проста «схаваць збор» — вялікія зборы выдаляюцца праз «танцы з бубнам» і перапіску з адміністрацыяй платформы. Мы гэта праверылі на прыкладзе аднаго з нашых вялікіх фандрайзераў, які фэйсбук выдаліў, а пра другі пакуль ідуць перамовы.
Дэ-факта сілавікі знаходзяць людзей па выпісках з банкаў, а потым патрабуюць паказаць Facebook Pay, з якога не выдаляюцца даныя пра плацяжы нават з выдаленых фандрайзераў.
Таму агульная рэкамендацыя — абараняць сябе наступным чынам у два крокі:
Перарэгістраваць свой фэйсбук на пошту і тэлефон, якімі вы не карыстаецеся. Гэта трэба, каб сілавікі не здолелі аднавіць ваш акаўнт, на што даецца 30 дзён пасля выдалення.
Пасля гэтага выдаліць акаўнт — толькі так выдаляюцца даныя з Facebook Pay.
Гэты метад толькі дазваляе пазбавіцца ад пацвярджэння ахвяравання і яго памеру. Пры гэтым ясна, што калі спецслужбы Беларусі хацелі запісаць усіх, хто ахвяраваў публічна раней, то яны даўно гэта зрабілі».
Але на практыцы сілавікоў не цікавіць, куды і на што дакладна вы данацілі. Любы факт данату праз фэйсбук на сёння ёсць падставай для пераследу і вымагання грошай у людзей».
«Наша Ніва» раней пісала, што на запыт з боку КДБ беларускія банкі далі спецслужбам інфармацыю аб плацяжах з беларускіх карт у бок Facebook за перыяд са жніўня 2020-га года, калі здарыўся ўсплёск данатаў у фонды. А пасля людзей выклікаюць, каб праверыць адрасата даната. То-бок вывучаецца не толькі інфармацыя, публічна даступная ў сацсетках.
«Наша Нiва» — бастыён беларушчыны
ПАДТРЫМАЦЬЧытайце яшчэ:
Чытачка, якую забралі за данат: Псiхалагiчны цiск быў страшэнны (парады ад нашай чытачкі)
Я ахвяраваў у фонды. Як зразумець, што я ў небяспецы?
Нават за 40 даляраў. Пачыналі з айцішнікаў, а цяпер за данаты пачалі цягаць усіх запар
Стала вядома, як КДБ вылічвае тых, хто данаціў у «Байсол»
![Клас Клас](https://nashaniva.com/images/reactions/reaction-like.png)
![Панылы сорам Панылы сорам](https://nashaniva.com/images/reactions/reaction-facepalm.png)
![Ха-ха Ха-ха](https://nashaniva.com/images/reactions/reaction-smile.png)
![Ого Ого](https://nashaniva.com/images/reactions/reaction-omg.png)
![Сумна Сумна](https://nashaniva.com/images/reactions/reaction-sad.png)
![Абуральна Абуральна](https://nashaniva.com/images/reactions/reaction-anger.png)