У Расіі падазраюць масквіча ў тым, што ён зʼяўляецца ўладальнікам Nexta Live. Nexta Live гэта абвяргае
Baza апублікавала інфармацыю, што маскоўскія следчыя западозрылі 27-гадовага жыхара Масквы ў тым, што ён з'яўляецца ўладальнікам праекта Nexta Live. Канал адказаў, што гэта ўкід, у рэдакцыі наогул няма грамадзян РФ.
Сёння Baza паведаміла, што маскоўскія следчыя зацікавіліся тэлеграм-каналам Nexta Live з-за публікацый ад сярэдзіны сакавіка мінулага года. Яны нібыта вылічылі, што каналам валодае 27-гадовы Алег С., які пражывае ў Маскве, нібыта на яго запісаная сімка, на якую аформлены канал.
NEXTA Live адказаў, што гэта няпраўда.
«Па-першае, сам факт таго, што наш супрацоўнік можа знаходзіцца ў Расіі ці Беларусі — гэта абсурд. У мэтах бяспекі ні адзін з дзейных прадстаўнікоў рэдакцыі не наведвае названыя краіны. Па-другое, у рэдакцыі NEXTA няма грамадзян РФ», — напісалі ў канале.
Канал выказаў здагадку, што расійскія сілавікі «захацелі атрымаць зорачку, не прыкладаючы лішніх высілкаў».
NEXTA Live — буйны тэлеграм-канал з 1,3 млн падпісчыкаў. Яго заснаваў беларус Сцяпан Пуціла.
