Кашаль — не адзіны сімптом. Вось што вядома пра кракен, самы заразны штам кавіду
Калісьці словам «кракен» назвалі легендарную марскую пачвару, вядомую па апісаннях ісландскіх маракоў. Цяпер жа гэтае слова выкарыстоўваюць у сувязі з пандэміяй кавіду і называюць ім новы штам хваробы, суперзаразны, але не такі небяспечны, як першыя штамы.
Фота: Ng Han Guan / AP Photo
Кракен шырока распаўсюджаны ў ЗША і Кітаі, хутка ён таксама можа стаць дамінуючым штамам кавіду ў Еўропе. Гэта мутацыя штама амікрон, вядомая таксама пад назвай ХВВ.1.5, піша gazeta.pl.
Сёння кракен лічаць самым заразным з вядомых штамаў кавіду, але вучоныя мяркуюць, што ён не прыводзіць да больш цяжкай хваробы, чым яго папярэднікі. Тым не менш, кракен выдатна абыходзіць імунную абарону ад кавіду, якая магла з’явіцца ў чалавека праз вакцынацыю ці перанесеную хваробу.
Тое, як працякае захворванне, залежыць ад моцы імунітэту чалавека. Людзі з добрым імунітэтам у некаторых выпадках могуць нават хварэць бессімптомна, але ў шматлікіх выпадках заражэнне кракенам суправаджаецца наступнымі сімптомамі:
- кашаль, часам працяглы;
- гарачка;
- парушэнне нюху ці смаку;
- ахрыпласць;
- галаўны боль;
- боль у горле і мускулах;
- задышка;
- закладзенасць носа;
- стомленасць;
- страта апетыту;
- дыярэя.
Цяпер невядома, наколькі вакцына абараняе ад заражэння кракенам. Тым не менш, наяўнасць прышчэпкі зніжае імавернасць цяжкага працякання кавіду, калі чалавек усё-такі захварэў.
Як сцвярджае беларускае Мінздароўя, пакуль што ў нашай краіне не было зафіксавана выпадкаў кракена. Што, натуральна, не азначае, што яго ў нас няма.
Чытайце таксама:
Коцікі — як лекі… Як бяздомны кот напоўніў новым сэнсам жыццё беларускага бізнэсмена
«Я не збіраўся капаць акопы». Медык з райцэнтра расказвае, чаму больш не вытрымаў
«Так, ёсць наркаманы, дык і што?» Як беларуска працуе на хуткай у Варшаве
