Financial Times: Грэф і Набіуліна не змаглі пераканаць Пуціна не пачынаць уварванне ва Украіну
Кіраўнік Сбербанка Герман Грэф і старшыня ЦБ Эльвіра Набіуліна спрабавалі адгаварыць прэзідэнта Расіі Уладзіміра Пуціна ад вайны, вынікае з лонгрыда, апублікаванага газетай Financial Times.
Герман Грэф. Фота: Pavel Bednyakov, Sputnik, Kremlin Pool Photo via AP
За месяц да таго, як Расія пачала поўнамаштабнае ўварванне ва Украіну, давераныя асобы Пуціна па эканамічных пытаннях наведалі яго рэзідэнцыю ў Нова-Агарове, каб праінфармаваць яго пра магчымыя наступствы заходніх санкцый, піша выданне, спасылаючыся на свае крыніцы.
Паводле іх звестак, Грэф выступіў перад Пуціным з 39-старонкавай прэзентацыяй, папярэдзіўшы расійскага прэзідэнта аб катастрафічных наступствах, якія могуць настаць, калі напружанасць вакол Украіны, якая ўжо тады дасягнула апагея, яшчэ больш абвострыцца.
Выданне называе Грэфа блізкім саюзнікам Пуціна яшчэ з часоў працы ў мэрыі Пецярбурга ў 1990-х, калі будучы кіраўнік Сбербанка меў рэпутацыю самага ліберальнага чальца пашыранага атачэння Пуціна — і выказваў сваё меркаванне.
Набіуліна, «паважаны кіраўнік ЦБ», і некаторыя іншыя падзялялі асцярогі Грэфа і дапамаглі падрыхтаваць прэзентацыю, вынікае з публікацыі.
Прэзентацыя ж папярэджвала, што «строгія санкцыі» за Украіну могуць выклікаць паніку на фінансавых рынках і адкінуць расійскую эканоміку на дзесяцігоддзі назад (а якасць жыцця расіян будзе адставаць нават ад узроўню краін, якія развіваюцца).
Са слоў некалькіх людзей, знаёмых з гэтым пытаннем, пакуль Грэф распавядаў пра магчымыя наступствы, Пуцін перапыніў яго і спытаў, што Расія павінна зрабіць, каб пазбегнуць горшых з санкцый, гаворыцца ў артыкуле.
«Занадта нясмелыя, каб перасцерагчы Пуціна ад ваеннай эскалацыі, у тэхнакратаў не было выразнага рашэння: і яны не маглі прымусіць сябе сказаць Пуціну, што яму пагражае геапалітычная катастрофа», — піша Financial Times. Яны пакінулі сустрэчу, так і не даведаўшыся, што менавіта Пуцін планаваў — і ці ўлічыў ён іх паведамленне, сцвярджае выданне.
«Яны былі досыць адважныя, каб папрасіць аб сустрэчы. Але яны не змаглі давесці свой меседж», — сказаў адзін з суразмоўцаў газеты.
Няздольнасць Пуціна прыслухацца да папярэджанняў спустошыла тэхнакратаў. «Я ніколі не бачыў [Грэфа] такім. Ён быў зусім разгублены, у стане поўнага шоку», — сказаў чалавек, які бачыў Грэфа ў першыя дні вайны.
