У Баранавічах затрымалі намесніка дырэктара крамы за павышэнне цаны на 13%

Баранавіцкая міжраённая пракуратура завяла крымінальную справу ў дачыненні да намесніка дырэктара аднаго з гандлёвых аб'ектаў паводле арт. 424 КК («Злоўжыванне службовымі паўнамоцтвамі»). Падазраванага затрымалі.

Фота ілюстрацыйнае

Як паведамляе прэс-служба Генпракуратуры, намеснік дырэктара 7 кастрычніка павысіў цану на адзін з харчовых тавараў на 13%, хоць ведаў пра дырэктыву аб недапушчальнасці росту цэн.

Яму цяпер пагражае да 10 гадоў па артыкуле за «злоўжыванне службовымі паўнамоцтвамі».

6 кастрычніка Аляксандр Лукашэнка запатрабаваў спыніць рост цэн. Была выдадзеная адпаведная дырэктыва, за выкананнем патрабавання сочаць супрацоўнікі Міністэрства антыманапольнага рэгулявання і гандлю, КДК і пракуратуры.

Сёння Лукашэнка заявіў, што масавых парушэнняў не выяўлена. «Толькі ў некаторых з тысяч правераных аб'ектаў, толькі ў дзясятцы выявілі невялікі рост цэн. Па ўсіх фактах распачатыя крымінальныя справы», — сказаў ён.