Знайсці
09.08.2022 / 19:521РусŁacБел

«Купілі стэйкі па прывабнай цане і здзівіліся». Што за чырвоная рыба прыехала ў нашы крамы?

Чырвоная рыба ўсім сваім выглядам і смакам добра ўпісваецца ў любое святочнае мерапрыемства. Магла б упісацца і ў будзённасць, калі б не цэны. Больш звыкла бачыць, як яны растуць. Але чытач «Анлайнера» знайшоў у краме ўпакоўку стэйку стронгі па леташняй цане. Гэта цуд? Ці, можа, гэта падробка пад стронгу?

Што за рыба

«Была акцыя — стэйкі стронгі на зніжцы. Склад: стронга, вада (ахоўная глазура). Цана спакуслівая, купілі, адкрылі. Пахне рачной рыбай, як карп, і на смак аказаўся сапраўдны карп», — здзіўляецца чытач.

Сённяшняя спакуслівая цана — гэта 12,99 рубля за 400-грамовую ўпакоўку стэйка. Калі б не акцыя, трэба было б дастаць з кашалька 17,99. Рыба ў звычайнай празрыстай упакоўцы з адной налепкай. Ніякіх маркетынгавых хітрыкаў, затое можна добра разгледзець змесціва пачка.

У мінулым лістападзе «Анлайнер» пісаў пра кілаграм стэйка за 37 рублёў, што гэта «дарагавата», а праз паўгода можна было назіраць і цэннікі ад 50 да 70 рублёў за ахалоджаныя стронгу і сёмгу — тое, што мы часцей за ўсё называем ласосем. Асобнай статыстыкі па гэтай рыбе няма, але Белстат паведамляе, што ў цэлым за год рыба падаражэла на 18%. Падобна на тое, што ласосевыя могуць быць у лідарах падаражэння ў рыбнай групе.

Жнівеньская цана ў «Санце»

У той жа час ёсць стронга, хай замарожаная, і на акцыі, амаль за 32,5 рубля.

Трэба браць? Правяраем.

І што ўсярэдзіне?

Этыкетка паведамляе: гэта аквакультура, рыба прыехала з Ірана.

Па паху — звычайная рыба, якая не выдае ў сабе ні стронгі, ні карпа — проста рыба. Ці пахне яна ракой, сказаць складана, хутчэй нечым з рыбнага маразільніка. Размарожаны стэйк ня развальваецца, навобмацак здаецца злёгку тлуставатым.

Звычайна ў 400-грамовай упакоўцы прадаюцца два стэйкі, тут жа іх чатыры, таму будзьце гатовыя да іх невялікага памеру. Але ва ўсякім разе нічога лішняга зразаць з рыбы не прыйшлося, пачышчаная яна была нармальна.

Рыбу з чароўнай цаной выдае толькі колер.

Абодва ўзоры заяўленыя як стронга, але злева — іранская рыбіна (12,99 рубля за ўпакоўку), а справа стэйк з упакоўкі, якая прадаецца ў крамах ужо шмат гадоў (цяпер за 31-38 рублёў).

Дзе ласосевы колер? Гэта мы яшчэ спытаемся ў вытворцы.

Візуальна здаецца, што тлустай праслойкі больш ва ўзору, які святлейшы. Але пры размарозцы больш тлустай атрымліваецца яркая рыба, якая пакідае светла-ружовыя кроплі.

Падобна на тое, што тлумачэнне ёсць на ўпакоўцы. У іранскай рыбе ўсяго 3,5 грама тлушчу на 100 грамаў рыбы — так піша вытворца. У яркай рыбе на ўпакоўцы паказана, што тлушчу там 14 грамаў. Атрымліваецца, іранская стронга больш дыетычная.

У працэсе гатавання бюджэтны стэйк не вельмі хоча падрумяньвацца і ў выніку застаецца бледна-ружовым. Пах здаецца звычайным, стандартным для рыбы. На смак стэйк падобны на мікс з розных рыб.

Добра гэта ці дрэнна, залежыць ад таго, наколькі каштоўныя для вас амаль 13 рублёў за ўпакоўку. Калі вы спрабавалі ласосевыя тэкстуры раней, вас не падманеш: па колеры і смаку гэта не зусім тыя стэйкі з чырвонай рыбы, да якіх вы прывыклі. А калі не ведаць, што гэта за рыба, і спрабаваць сляпым метадам?

Здаецца, дэгустатарам пазнаць у ёй стронгу складана. Толькі адзін чалавек адразу сказаў, што ўжо бачыў у краме бледна-ружовую стронгу.

«Рыбу асабліва не ем, але стэйкі з ласося, асабліва калі яны добра прыгатаваныя, люблю. Гэта нагадвае гарбушу, якую дома гатавалі ў духоўцы на Новы год, або рыбу з дзіцячага саду. Так сабе».

«Я эксперт па чырвонай рыбе і вельмі люблю стэйкі. Гэтая рыба здаецца сухой у параўнанні са звычайнай стронгай. Там, дзе ёсць тлушч, яна смачнейшая».

«Па смаку нармальна, есці такое можна, але адмыслова ў краму за такім я б не паехаў».

«Гэта можна лічыць смачным, не бачу ў ёй чагосьці вельмі дзіўнага. 32 рублі за кілаграм? У прынцыпе, сваіх грошай каштуе».

Адкуль у Іране наогул стронга?

Калі коратка, яе ў Іране нашмат больш, чым вы думаеце. Рыба з гэтай усходняй краіны — гэта не нейкі нонсэнс. Іранскія крыніцы пішуць, што аквакультурай у краіне сур'ёзна пачалі займацца з 1959 года, калі ў Тэгеране сталі праводзіць эксперыменты па вырошчванні стронгі. Зараз пераважаюць кітайскія карпы і вясёлкавая стронга, вырашчаная ў прэснай вадзе.

Акрамя таго, краіна актыўна займаецца крэветкамі і ікрой, гэта таксама экспартныя артыкулы.

Фота: financialtribune.com

Вытворчасць вясёлкавай стронгі ў Іране значна павялічылася ў 2010-я гады і практычна падвоілася за апошняе дзесяцігоддзе. Іншымі буйнымі сусветнымі вытворцамі называюць Турцыю, Нарвегію, Чылі і Перу.

«Усе прывыклі, што стронга — гэта высокая кухня»

Чаму ў гэтых стэйках так складана пазнаць стронгу? Звяртаемся з гэтым пытаннем да кампаніі «Сіла мора», якая значыцца на этыкетцы вытворцам. У кампаніі ўдакладняюць: яны толькі нарэзалі рыбу на стэйкі, сам прадукт з Ірана.

«Цяпер на беларускім рынку ёсць стронга з Турцыі, Расіі, Арменіі, Эстоніі. Мы вырашылі паспрабаваць іранскую і прывезці ў Беларусь пробную партыю. Таму цяпер правяраем, глядзім, якія будуць водгукі. Усе прывыклі, што стронга, ласось — гэта высокая кухня і адпаведны выгляд. У іранскай стронгі трохі іншы смак, яна падобная да карпа. Хтосьці любіць такі смак, хтосьці не. Але любая стронга на нашым рынку будзе аквакультурай.

У тым, што смак і колер стронгі могуць адрознівацца, няма нічога крамольнага: усё залежыць ад вады і корму. Іранскія экспарцёры пішуць, што, кіруючы дыетай, могуць дамагчыся яркага колеру рыбы. Але падобна, што гэта не прыярытэт.

На пытанне, ці можа стронга каштаваць так танна, у кампаніі адказваюць, што рыбу прывезлі яшчэ ў красавіку, цяпер яе кошт у Іране мог падрасці прыкладна на 20%.

Правесці здзелку з іранскім прадаўцом — той яшчэ квэст з улікам абмежаванняў на фінансавыя аперацыі з гэтай краінай, таму рыбу куплялі праз Расію. Даставіць яе адтуль адназначна танней, чым іншы імпарт з Клайпеды.

«Калі раней прывезці з Клайпеды фуру з 19,5 тоны рыбы каштавала 700 даляраў, то цяпер — 4-6 тыс даляраў. Зразумела, што ўсе гэтыя выдаткі будуць адбівацца на выніковай цане.

Nashaniva.com

Хочаш падзяліцца важнай інфармацыяй
ананімна і канфідэнцыйна?

Клас
Панылы сорам
Ха-ха
Ого
Сумна
Абуральна
0
Пін Цэт/адказаць/
09.08.2022
Некалі лавілі балтыйскую стронгу, ды й цяпер яна ёсьць, прыродную, не з садкоў, дык яна ўвогуле не мела таго рудога колеру. Тое самае і ў канадскай, прыроднай. Пэўна колер той надаюць пратэіны, якой пічкаюць садковую рыбу, прымушаючы хутчэй расьці.
Каб пакінуць каментар, калі ласка, актывуйце JavaScript у наладах свайго браўзера
Каб скарыстацца календаром, калі ласка, актывуйце JavaScript у наладах свайго браўзера