Анжаліку Борыс перавялі на хатні арышт
Старшыня Саюза палякаў Беларусі Анжаліка Борыс на свабодзе. Яна ў вёсцы пад Гродна, камунікаваць з польскімі дыпламатамі ёй забаронена. Прашэння аб памілаванні яна не пісала.
Юрый Васкрасенкі, якому даручана ўладамі камунікацыя наконт памілавання палітвязняў, назваў вызваленне Борыс «міласэрным» рашэннем Лукашэнкі, пасля якога беларускі бок спадзяецца пачаць нармалізацыю адносін польскага і беларускага бакоў.
Змена меры стрымання для Борыс — гэта ўжо другі жэст на адрас «ачмурэлых палякаў». Першым была дэпартацыя рэштак мігрантаў з Брузгоў. Усё гэта — на фоне правальнай расійскай аперацыі ва Украіне і ва ўмовах знаходжання расійскіх войскаў у Беларусі.
Анжаліка Борыс была затрыманая год таму, 23 сакавіка 2021 года. Яна праходзіла па справе аб «распальванні рэлігійнай і нацыянальнай варожасці» (частка 3 артыкула 130 КК).
Па гэтай справе былі арыштаваныя актывісткі Саюза палякаў з Ліды, Ваўкавыска і Брэста Ірэна Бярнацкая, Марыя Цішкоўская і Ганна Панішава. Праз некалькі месяцаў утрымання ў СІЗА іх вызвалілі і прымусілі пакінуць Беларусь.
Гродзенскі журналіст Андрэй Пачобут быў арыштаваны роўна год таму, 25 сакавіка 2021 года. Ён працягвае заставацца за кратамі.
