Трэнды змяняюцца. Google адсачыў, як працоўныя мігранты з Беларусі пераключыліся з Расіі на Польшчу
Беларускае кіраўніцтва запэўнівае Расію, што Беларусь зусім не разварочваецца на Захад. Аднак самі беларусы ўжо даўно развярнуліся ў заходнім кірунку. Прынамсі, у пытаннях працаўладкавання і міграцыі. Сэрвіс Google Trends паказвае, калі адбыўся пералом і які рэгіён краіны цяпер менш за ўсё цікавіцца працай у Расіі, піша Hrodna.life.
Ездзіць на заробкі ў іншыя краіны для беларусаў — звычайная справа. Але апошнім часам колькасць мігрантаў хутка павялічваецца і гэта прызнае нават афіцыйная статыстыка.
Самым папулярным накірункам для выезду на заробкі раней была Расія. Падзеі ва Украіне ў 2014 годзе, анэксія Крыму і далейшыя санкцыі абрынулі курс расійскага рубля. Гэта падштурхнула беларусаў да пошуку іншай краіны для працы.
Падзенне курса — падзенне попыту
Працу актыўна шукаюць з дапамогай інтэрнэту. Згодна з дадзенымі Google Trends рост колькасці запытаў «работа в Польше» з Беларусі ў пашукавіку прыйшоўся на пачатак 2015 года. Гэта акурат той час, калі курс расійскага рубля вагаўся ў межах 65 за долар.
Аб’ява на тэрыторыі Польшчы, надалёка ад мяжы з Беларуссю.
Гэты трэнд захаваўся і ўжо праз год, у пачатку 2016, запыт «Работа в России» саступіў па папулярнасці запыту «работа в Польше». З таго часу колькасць запытаў «Работа в Польше» расце, а колькасць запытаў «работа в России» працягвае падаць.
Расклад па рэгіёнах
Праца ў Расіі больш за ўсё цікавіць жыхароў усходніх рэгіёнаў Беларусі. Але ў 2018 годзе ўжо нідзе ў краіне запыт «Работа в России» не перавышае па папулярнасці «Работа в Польше».
За год толькі ў Польшчу з’язджае цэлы горад
Тое, што ўсё больш беларусаў выбіраюць для працы і міграцыі краіны ЕС пацвярджаюць лічбы Еўрастату.
У 2017 годзе 51 841 грамадзянін Беларусі атрымаў від на жыхарства ў краінах Еўрапейскага саюза. З іх 42 756 атрымалі від на жыхарства ў Польшчы. Апроч гэтага ў 2017 годзе 35 000 беларусаў атрымалі польскія працоўныя візы.
Калі скласці гэтыя лічбы, то атрымаецца, што летась толькі ў Польшчу з’ехаў цэлы Жлобін (76 тысяч) або дзве Смаргоні.
